Usa2Georgia-ს წინააღმდეგ  საქართველოს კონკურენციის სააგენტოში სარჩელი შევიდა. ინფორმაცია „კომერსანტს“  სააგენტოში დაუდასტურეს. როგორც უწყებაში აცხადებენ, საკითხზე სავარაუდოდ დაიწყება მოკვლევა.

ბოლო რამდენიმე დღეა,  სოციალურ ქსელში მომხმარებლები აქტიურად წერენ იმის შესახებ, რომ კომპანიამ ამანათის ტრანსპორტირების საფასური ისე შეცვალა, რომ  წინასწარ არავინ გააფრთხილა.  ცვლილების შედეგად  ამანათის  ტრანსპორტირება, ზოგ მოქალაქეს ნივთზე ძვირი უჯდება.

რამდენიმე დღის წინ ფეისბუქში „USA2GEORGIA-ს მიერ დაზარალებულ მომხმარებელთა ჯგუფი“ შეიქმნა, სადაც ამ დროისთვის 787 წევრია. ისინი ერთმანეთს გამოცდილებას უზიარებენ და პრიბლემის გადაჭრის გზებზე მჯელობენ.

ერთ-ერთი უკმაყოფილო მომხმარებელი  მომღერალი მებო ნუცუბიძე, რომელმაც Black Friday-ზე ამერიკიდან 2 წყვილი ბოტასი გამოიწერა, აპლიკაციაში ტრანსპორტირების საფასური კი  195,5 ლარი დახვდა.

როგორც  „კომერსანტთან“ საუბრისას მებო ნუცუბიძე აღნიშნავს,  ცვლილების  შესახებ მას კომპანიისგან არც მოკლე ტექსტური შეტყობინება მიუღია და არც ელექტრონული წერილი.

„შავ პარასკევს, მეც, როგორც ყველამ საქართველოში, ფასდაკლებით ვისარგებლე და გამოვიწერე 2 წყვილი ბოტასი, აღმოჩნდა, რომ მახდევინებენ ჩამოტანაში იმდენს, რაც გადავიხადე თვითონ ნივთში, ანუ ამანათი რვა კილოთია დათვლილი, რაც  პრინციპში  წარმოუდგენელია, როგორ  შეიძლება  რომ თითო წყვილი ბოტასის წონა  4 კილო იყოს.

აქ მთავარი არის ის, რომ ეს ყველაფერი გაუფრთხილებლად მოხდა, ამბობენ, რომ აპლიკაციაში შესვლისას გხვდებოდა შეტყობინება, მაგრამ მე  ჩემი მისამართი  საიტებზე დამახსოვრებული მქონდა და აპლიკაციაში, ორი წელია,  საერთოდ  არ შევსულვარ. მე როგორც იქამდე, ორი წლის  განმავლობაში  ვიწერდი ნივთებს, ისე გავაგრძელე, ანუ თუ რაღაც წესი შეცვალეს, ეს მომხმარებლისთვის წინასწარ უნდა ეცნობებინათ, როდესაც აღნიშნულის შესახებ ვიქნებოდი ინფორმირებული, შეიძლება სულ  არ მეყიდა ეს ორი  ნივთი. მთავარი გასაბრაზებელი  ფაქტი ის არის, რომ არ გაგვაფრთხილეს და ყველაფერი ისე ქნეს, რომ რაც შეიძლება ნაკლებ ადამიანს გაეგო ცვლილების შესახებ და ცვლილება მაინც და  მაინც  15 ნოემბრიდან შევიდა ძალაში, მაშინ როდესაც „შავი პარასკევი“ იწყებოდა,“ - აღნიშნა მებო  ნუცუბიძემ.

ნუცუბიძე „კომერსანტთან“ ამბობს, რომ კომპანიას  არ  დაკონტაქტებია, რადგან  აპირებს რომ ოფიციალური  წერილით მიმართოს  და მდგომარეობა აუხსნას.

„მაინც  არ  ვკარგავ იმედს, რომ ამდენ დაზარალებულ მომხმარებელს  გაითვალისწინებენ, რეალურად იმდენი ადამიანი  წერს ამ ყველაფერზე, რომ  დიდი  საფრთხეა, რომ კომპანიამ ბევრი ადამიანი დაკარგოს, მითუმეტეს მაღალი კონკურენციის პირობებში, რადგან დღეს ძალიან ბევრი გადამზიდი კომპანია არსებობს. უბრალოდ, მე 10 წელია ამ კომპანიის მომსახურებით, ერთგულად ვსარგებლობ და თუ ისინი პირობებს არ შეცვლიან,, მე მათ მომსახურებაზე უარს ვიტყვი.  ვაპირებთ, რომ ოფიციალური ფორმა  მივცეთ პროცესს. ადრე  იყო წესი, თუ ნივთი იყო  10 კილოგრამამდე არ ითვლიდნენ მოცულობით, შესაბამისად  აქამდე  ჩამოდიოდა  წონით.  15 ნოემბერს შეტყობინებითაც არ  მომსვლია ინფორმაცია და პირადად მე ელექტრონული ფოსტაც კი არ მიმიღია. მე არ უნდა მქონდეს იმის ვალდებულება, რომ საიტზე შევიდე და გადავამოწმო ცვლილება, სავარაუდოდ სწორედ ეს იყო ჩანაფიქრი, რომ რაც შეიძლება ნაკლებ ადამიანს გაეგო ცვლილების შესახებ“, - აღნიშნა მებო ნუცუბიძემ.

„კომერსანტი“ კიდევ ერთ მომხმარებელს ესაუბრა, რომელიც  ამბობს, რომ გამოიწერილ ნივთს  შეფუთვაზე აწერია წონა —  3 კილოგრამი, თუმცა usa2Georgia - მ ეს ნივთი 8 კილოგრამით დაიანგარიშა.

დღეის მდგომარეობთ usa2georgia-ს საიტზე წერია, რომ 1 კგ ამანათის ტრანსპორტირება 9$ ღირს.

მომხმარებელთა ნაწილი ამბობს, რომ მათ  27 ნოემბერს „შავი პარასკევის“ შემდეგ ელექტრონულ ფოსტაზე მიიღეს შეტყობინება, რომ გადაფუთვის სერვისი დაბრუნდა და მათთვის  არ იყო მკაფიოდ განმარტებული, რომ თუ  ადრე თვითონ კომპანია აკეთებდა გადაფუთვას, 15 ნოემბრის შემდეგ ამ სერვისით სარგებლობისთვის კლიენტს თავად  უნდა მიეთითებინა, წინააღმდეგ შემთხვევაში დაანგარიშება უმეტესად მოცულობით მოხდებოდა.

„როგორც უკვე აღვნიშნეთ 8 ნოემბრის სტატიაში, მომხმარებელთა მრავალრიცხოვანი თხოვნის გამო - USA2GEORGIA-მ ამანათების გადაფუთვის მომსახურება დააბრუნა!

 სიახლეს არ წარმოადგენს ის ფაქტი, რომ ამერიკაში ონლაინ-მაღაზიების უმრავლესობა უზარმაზარი ყუთებით აგზავნის პროდუქციას, ხოლო მომხმარებელს უწევს საერთაშორისო ავია-გადაზიდვის სტანდარტების მიხედვით ამანათის მოცულობითი წონის გადახდა.

ასე, რომ - შეგიძლიათ ისარგებლოთ <გადაფუთვის სერვისით> და ტრანსპორტირებისას დაზოგოთ მნიშვნელოვანი თანხა.

გადაფუთვის მომსახურების გააქტიურება შეგიძლიათ ამანათების მიღებამდე, თრექინგ კოდის მისაღებ ამანათებში დამატების შემდეგ. ასევე, პარამეტრებში -> გადაფუთვა, შეგიძლიათ მიუთითოთ ავტომატური გადაფუთვა და თქვენი ყველა მისაღები ამანათი გაივლის შემოწმებას გადაფუთვის შესაძლებლობაზე. გთხოვთ გაითვალისწინოთ, რომ გადაფუთვის მომსახურების მიღება დამოკიდებულია პროდუქციის და შეფუთვის სახეობაზე.

ამანათების გადაფუთვის მომსახურება არის ფასიანი და მომხმარებელს ექნება წვდომა ინფორმაციაზე, გადაფუთვის მომსახურების ჩართვის შედეგად - რამდენია დანაზოგი.“,- ეწერა შეტყობინებაში.

კომპანია მომხმარებელთა პრეტენზიებს ჯერჯერობით ოფიციალურად არ გამოხმაურებია. „კომერსანტი“ აგრძელებს თემაზე მუშაობას და ცდილობს კომპანიის კომენტარის მოპოვებას.

თაკო კვაჭანტირაძე