საკლუბო ინდუსტრია საქმიანობას 5-6 მარტიდან განაახლებს, თუმცა ძალაში რჩება შეზღუდვა, რომლის თანახმად, კლუბებში სტუმართა შესაძლო მაქსიმალური ოდენობის 60% დაიშვება. აღნიშნული ინფორმაცია მთავრობის ადმინისტრაციის პრეს–სამსახურმა 15 თებერვალს გაავრცელა. 

ღამის კლუბის “ხიდი“ მენეჯერმა სოფო ებრალიძემ “კომერსანტთან“ საუბრისას აღნიშნა, რომ მარტის პირველივე შაბათ-კვირას მუშაობას განაახლებენ თუმცა ე.წ. მწვანე პასპორტის რეგულაციას ჯერჯერობით ძალაში ტოვებენ. 

“ჯერჯერობით მწვანე პასპორტის რეგულაციას კვლავ განვიხილავთ, თუმცა შემდეგი ორი კვირა დავაკვირდებით ეპიდ სიტუაციას და იმის მიხედვით მივიღებთ საბოლოო გადაწყვეტილებას. თუმცა ამ ეტაპზე დატოვებული გვაქვს.

ერთადერთი შეზღუდვა რაც მთავრობის მხრიდან გვაქვს, ჩვენ ღონისძიებებზე მხოლოდ მომხმარებელთა 60% -ის დაშვება შეგვიძლია“, -  აღნიშნა სოფო ებრალიძემ.

რაც შეეხება კომპენსაციას, რომელსაც მთავრობა კლუბებს თვენხევარი მუშაობის გაჩერების სანაცვლოდ შეჰპირდა, სოფო ებრალიძე ამბობს, რომ ამ საკითხზე წინსვლა ჯერჯერობით არ არის. 

“კლუბების ასოციაციის წარმომადგენელს  დავით ლეჟავას ჰქონდა მთავრობასთან კომუნიკაცია თუმცა  ჯერჯერობით მათგან არაფერი ისმის“, -  აღნიშნა სოფო ებრალიძე,

Შეგახსენებთ, რომ საკოორდინაციო საბჭოს  რეკომენდაციით, კორონავირუსის  გავრცელების პრევენციის მიზნით, კლუბებმა მუშაობა 2022 წლის 15 იანვრიდან მეორედ შეაჩერეს. 

“ბოლო ღონისძება 15 იანვარს გვქონდა, მერე გავჩერდით იმ პირობით, რომ მარტის პირველივე  შაბათ-კვირას გავიხსნებოდით და ასეც ხდება. 

რაც შეეხება ზარალს საკმაოდ რთული ფინანსური მდგომარეობა გვაქვს, ამ თვენახევრის გარდა იქამდე ჩვენ ორი წელი დახურული ვიყავით და საკმაოდ რთული ფინანსური მდგომარეობა გვაქვს. დახურულ კლუბსაც თავისი ხარჯები აქვს, თანამშრომლები რომლებიც  ორწლიანი პაუზის მერე თანამშრომლები სხვა სამსახურებიდან წამოვიყვანეთ და მათ ამ თვენახევარშიც ვუხდიდით ხელფასს რადგან შეგვენარჩუნებინა“, -  აღნიშნა სოფო ებრალიძემ.

თაკო კვაჭანტირაძე