ლევან კობერიძემ რადიო „კომერსანტზე“ თავის საავტორო გადაცემაში „ბრენდი საქართველო“ ბრენდის ფსიქოლოგიაზე საუბრისას დიმიტრი უზნაძეზე და ქართული ფსიქოლოგიის განვითარებაში მის როლზეც ისაუბრა. გადაცემის ავტორისა და წამყვანის თქმით, უზნაძის განწყობის თეორია უნდა იყოს  ერთ-ერთი ძალიან საამაყო რამ ქართველი პოლიტიკოსებისა და ბიზნესმენებისთვის, რომ აღარაფერი ვთქვათ ბრენდინგის, მარკეტინგის და კომუნიკაციების სპეციალისტებზე.

„ჩვენ გვყავდა უდიდესი მეცნიერი დიმიტრი უზნაძე, რომელიც ქართული ფსიქოლოგიის ფუძემდებელია, სახელმწიფო უნივერსიტეტში კათედრა სწორედ მან შექმნა და ის თეორია, რომელიც „განწყობის თეორიის“  სახელით არის ცნობილი, სწორედ რომ მნიშვნელოვანწილად ასახავს  ადამიანის ქცევის წინაპირობებს, თუ როგორ უკავშირდება ადამიანის ქცევა მის განწყობებს.

სწორედ ამიტომ, უზნაძის განწყობის თეორია სამაგიდე წიგნი უნდა იყოს ქართველი პოლიტიკოსებისა და ბიზნესმენებისათვის, რომ აღარაფერი ვთქვათ ბრენდინგის, მარკეტინგის და სტრატეგიული კომუნიკაციების სპეციალისტებზე“, -  აღნიშნა ლევან კობერიძემ.

„ბრენდი საქართველოს“ სტუმარი ამ თემაზე სასაუბროდ ფსიქოკონსულტანტი ილია ნიკაჭაძე იყო, რომელმაც აღნიშნა, რომ „ნებისმიერი ადამიანის  ქცევას საფუძვლად უდევს ადამიანის ფსიქოლოგიური განწყობა და ნებისმიერი ქცევის განმაპირობებელი არის ადამიანის ფსიქოლოგია“.