კრასნოდარში, სოფელ ბაკინსკაიას სასაფლაოზე საფლავების რაოდენობა, რომელიც არალეგალური სამხედრო ნაწილ „ვაგნერს“ ეკუთვნის, ბოლო ორი თვის განმავლობაში შვიდჯერ გაიზარდა.
„ვაგნერი“ რუსული არაოფიციალური სამხედრო ნაწილია, რომელიც სამხედრო დეპარტამენტების ბალანსზე და იურიდიულ პირთა რეესტრში არ არის. მისი დამფუძნებელი კრემლთან დაახლოებული ბიზნესმენი ევგენი პრიგოჟინია.
„ვაგნერის“ სასაფლაოზე საფლავების ზრდასთან დაკავშირებით The New York Times-ი წერს. სამშაბათს, 24 იანვარს გადაღებული სატელიტური სურათების საფუძველზე გამოცემა წერს, რომ სასაფლაოზე ამჟამად 170 საფლავია. მაშინ როცა გასული წლის 24 ნოემბრით დათარიღებულ სურათებში შვიდჯერ ნაკლები იყო.
საფლავების გარდა, გამოცემის ჟურნალისტებმა 21 კოლუმბარიუმი (კრემაციის შემდეგ ფერფლის განსათავსებელი ადგილი) დათვალეს, თითოეულში 42 ნიშით, რომლებიც პრიგოჟინთან ერთ-ერთ ვიდეოში ბაზის მახლობლად მდებარე სამლოცველოში გამოჩნდა. NYT-ი წერს, რომ ეს საფუძველს გვაძლევს ვივარაუდოთ, რომ აქ ასობით დაღუპული ვაგნერის მებრძოლია დაკრძალული.
გასული წლის დეკემბრის ბოლოს ვაგნერის ქვედანაყოფის მფლობელმა ევგენი პრიგოჟინმა დაადასტურა, რომ ახლად შექმნილი სასაფლაო კრასნოდარის ტერიტორიის სოფელ ბაკისკაიაში, მის კერძო სამხედრო კომპანიას ეკუთვნის.
„ვაგნერის“ სამხედრო ნაწილის მფლობელის თქმით, აქ მათი საფლავებია ვისაც, სხვადასხვა მიზეზის გამო, გარდაცვალების შემთხვევაში „ვაგნერის“ სამლოცველოს მახლობლად სურდა დაკრძალვა.
შეგახსენებთ, რომ „ვაგნერის“ დამფუძნებელი ევგენი პრიგოჟინი, კრემლთან დაახლოებული ბიზნესმენია, რომელიც ცნობილია როგორც „პუტინის შეფი“. 2022 წლის სექტემბერში მან საბოლოოდ აღიარა თავისი კავშირი „ვაგნერთან“, თუმცა ადრე სასამართლოში უარყო ბრალდებები იმის შესახებ, რომ „ვაგნერის“ მფლობელია.
რუსეთის კანონმდებლობა კერძო სამხედრო კომპანიების საქმიანობას კრძალავს. თუმცა, ჯერ კიდევ 2012 წელს ვლადიმერ პუტინმა მათ ლეგალიზაციაზე ისაუბრა და შესაბამისი კანონის მიღების პირველი მცდელობა 2014 წლის ოქტომბერში იყო. 2018 წელს, კერძო სამხედრო კომპანიების ლეგალიზაციის კანონპროექტი სახელმწიფო სათათბიროში ხელახლა იქნა წარდგენილი, მაგრამ არ დამტკიცდა. 2022 წლის მარტში, უკრაინაში ომის დაწყების შემდეგ, „სამართლიანი რუსეთის“ ლიდერმა სერგეი მირონოვმა კვლავ წარადგინა კანონი განსახილველად. მალე რუსი დეპუტატები კიდევ ერთხელ განიხილავენ კანონპროექტში შესატან ცვლილებებს, რომელიც რუსეთის პრეზიდენტის გადაწყვეტილებით მოხალისეთა დანაყოფების შექმნას ითვალისწინებს.