Netflix-ის პოპულარული სერიალი „კალმარის თამაში“ ბევრს ფანტასტიკურ ან ტიუტოპიად მიაჩნია, თუმცა, არა იქ, სადად ეს სერიალი გადაიღეს - სამხრეთ კორეაში. მთელს მსოფლიოში სამხრეთ კორეას უნიკალური ეკონომიკური სასწაულის ქვეყნის რეპუტაცია აქვს. 1953 წელს, როდესაც დასრულდა დამანგრეველი სამოქალაქო ომი სამხრეთ და ჩრდილოეთს შორის, ეს იყო მსოფლიოს ერთ-ერთი უღარიბესი ქვეყანა. გააზრებული ეკონომიკური და საგანმანათლებლო პოლიტიკის, მკაცრი შრომითი ეთიკის და საბაზრო ეკონომიკაზე ორიენტაციის წყალობით სამხრეთ კორეა მოწინავე ინდუსტრიული ქვეყანა გახდა. თუმცა, რამდენიმე ეკონომიკური კრიზისის და სუპერ კორპორაციების გავლენის უსაზღვრო ზრდის პირობებში ამ წარმატებამ თავისი ბრწყინვალება ნაწილობრივ დაკარგა - შრომისუნარიანი მოსახლეობის მეოთხედს მუდმივი სამუშაო არა აქვს, მოქალაქეებს ფულის დაზოგვა ძალიან უჭირთ. მსხვილ კომპანიებში ვაკანსიის მისაღებად ადამიანებს განათლებაში ათობით ათასი ევროს ჩადება უწევთ, თანაც ბოლო წლებში ქალაქებში უძრავი ქონება უკიდურესად გაძვირდა. ამან გამოიწვია ის პრობლემა, რომელსაც სერიალში ვხედავთ, - ზრდადი და ამოუწურავი ვალები, რომლებიც მოსახლეობის დიდ უმრავლესობას ახჩობს. სოციალური დაცვის სისტემის არარსებობა ამ პრობლემას კიდევ უფრო აღრმავებს - შედეგად კერძო პირების ვალები 1,5 ტრლნ. დოლარს შეადგენს, რაც მშპ-ს მაჩვენებელს აღემატება.
სამხრეთ კორეის ცენტრალური ბანკის ცნობით, მოსახლეობის 6%-ის დავალიანება კრიტიკულ ზღვარს მიუახლოვდა.
„როდესაც ვუყურებდი სერიალს, ისეთი შთაბეჭდილება შემექმნა, რომ ეს დოკუმენტური ფილმი იყო, იმდენად ზუსტად ასახავს ის ჩვენს ქვეყანაში შექმნილ მდგომარეობას“ - ამბობს სეულის მკვიდრი ჰანს ანგუინი. მისი თქმით, რეალობა თითქმის 100%-იანი სიზუსტითაა აღწერილი, იმ განსხვავებით, რომ წაგებულებს რეალურ ცხოვრებაში არ კლავენ. თუმცა, არის შემთხვევები, როდესაც გაფიცვების გამო უკმაყოფილების ღიად გამომხატავ ადამიანებს ციხეში უშვებდნენ.
სამხრეთ კორეელებისთვის „კალმარის თამაში“ მათი ყოველდღიურობის ანარეკლია. პროფკავშირების უთანასწორო ბრძოლა გიგანტურ კორპორაციებთან, მიგრანტები აზიის ღარიბი ქვეყნებიდან, რომლებსაც ხელფასებს არ უხდიან, რადიკალური კაპიტალიზმის არაერთი სხვა გამოწვევა. ალბათ სწორედ ესაა სამხრეთ კორეაში თვითმკვლელობების საგანგაშოდ მაღალი დონის მიზეზები.
მცირე და საშუალო ბიზნესს ყოველდღიურ რეჟიმში თავისი „კალმარის თამაში“ უწევს.
არსებული პრობლემები პანდემიამაც გაართულა. მცირე მეწარმეების 80%-ს საბანკო ვალების გამო გაკოტრება ემუქრება. ახალგაზრდებს შორის, რომლებმაც განათლების დასაფინანსებლად სესხები აიღეს, დავალიანება 2019 წელთან შედარებით 21%-ით გაიზარდა.
იმის გამო, რომ დაგროვილ კითხვებზე პოლიტიკოსების პასუხები არ ჩანს, „კალმარის თამაშის“ ფორმატის ტელესერიალები სამხრეთ კორეაში პოპულარული კიდევ დიდხანს იქნება.
შეძლებს კი პოპულარული სერიალი შექმნილი ვითარების შეცვლას?
„ალბათ არა, სავარაუდოდ სერიალი სამომხმარებლო საქონელი იქნება,რომელსაც მალე დაივიწყებენ,“ - ამბობს ჰანს ინგუინი,რომელსაც, თავის მეგობრებთან ერთად, მსხვილ კორპორაციებში თანამშრომელთა მასობრივი პროტესტის გამოხატვის გამო, ჯარიმების სახით უზარმაზარი თანხის - 2,5 მლნ, ევროს გადახდა მოუწევს.
ავტორი: თენგიზ აბლოთია
წყარო: diepresse.com