რუსეთ-უკრაინის ომის გამო დაწესებული სანქციების შედეგად ოკუპანტი ქვეყნიდან თითქმის ყველა ცნობილი ბრენდი გავიდა. Inditex-მა, რომელიც ტანსაცმლის რამდენიმე პოპულარულ ბრენდს ფლობს, რუსეთში ყველა მაღაზიის დახურვისა და ონლაინ პლატფორმის შეჩერების შესახებ განაცხადა. კერძოდ, კომპანია დახურავს შემდეგი ბრენდების 502 მაღაზიას: Zara, Massimo Dutti, Bershka, Oysho, Pull & Bear და Stradivarius.
რა გავლენას მოახდენს ეს პროცესები ქართული ბაზრის აღნიშნულ სეგმენტზე, თემაზე „კომერსანტი“ Retail Group Georgia-ს ხელმძღვანელს რეზო მაღალაშვილის ესაუბრა.
„რუსეთში ეს ბრენდები არა ფრენჩაიზის გზით ოპერირებდნენ, არამედ თვითონვე იყვნენ წარმოდგენილები. ისინი პარტნიორების გარეშე პირდაპირ ოპერირებენ დიდ ბაზრებზე. შესაბამისად, რუსეთის ბაზრიდან ბრენდების გასვლას პირდაპირი ეფექტი საქართველოზე არ აქვს, თუმცა სხვა გვერდით მოვლენებს სექტორზე გავლენა ნამდვილად ექნება. საქართველო ამ ქვეყნების რეგიონშია და ჩვენი ეკონომიკური მდგომარეობა დამოკიდებულია მათზე, რადგან აქტიური ვაჭრობა გვაქვს რუსეთთან და უკრაინასთან. ომის შედეგად ვალუტის კურსის გუფასურება და მოსახლეობის მსყიდველობითუნარიანობის შემცირება რითეილ სექტორზე მნიშვნელოვან გავლენას მოახდენს.
2022 წელს ვაპირებთ რამდენიმე ახალი ბრენდის შემოყვანას საქართველოს ბაზარზე, თუმცა ასეთ არაპროგნოზირებად სიტუაციაში, რთულია ვისაუბროთ სამომავლო გეგმებზე“, — ამბობს მაღალაშვილი.
Retail Group Georgia მოდის რითეილის სფეროში მსოფლიოს ერთ-ერთი წამყვანი და მრავალფეროვანი პორტფელის მქონე Alhokair Fashion Retail-ის შვილობილი კომპანიაა. ჯგუფი 90-მდე ცნობილ ბრენდს აერთიანებს და კავკასიასა და ცენტრალურ აზიაში, ჩრდილოეთ აფრიკაში, ბალკანეთის ქვეყნებსა და ამერიკაში 2000-ზე მეტ მაღაზიას ფლობს. მის პორტფელშია: Zara, Massimo Dutti, Marks & Spencer, Mango, Bershka, Pull & Bear, Aldo, CHARLES & KEITH, Stradivarius, Oysho, Zara Home, Sergent Major, La Vie en Rose და სხვა.
ნინო თამაზაშვილი