კოვიდ-19-მა შრომის ბაზარზე დღის წესრიგი თითქმის შეცვალა. ანალიტიკოსები არ გამორიცხავენ, რომ დისტანციური მუშაობა ფართოდ გავრცელდეს პოსტკოვიდურ პერიოდშიც როგორც მსოფლიოში, ასევე საქართველოშიც. მართალია, ახალ გარემოებას დადებითი ფაქტორებიც ახლავს თან, თუმცა, როგორც სტატისტიკოსი სოსო არჩვაძე განმარტავს, გარკვეულ პრობლემასაც უკავშირდება.

„ინფორმაციის შეგროვების, მონიტორინგის, მართვის, სწავლების ცალკეულ სფეროებში ცვლილებებია და ეს მიდგომა გარკვეულწილად შენარჩუნდება. თუმცა ყველგან დისტანციური მუშაობა შეუძლებელია, განსაკუთრებით იმ სფეროებში, სადაც აუცილებელია პრაქტიკისა და უნარჩვევების გამოვლენა, როგორც შეიძლება იყოს სამედიცინო სფერო, სახელოვნებო სტუდიები და ა.შ. ცხოვრების წესის შეცვლას თავისი დადებითი მხარე აქვს და პანდემიამ მნიშვნელოვნად დააჩქარა ტექნიკური პროგრესი, სწრაფად წავიდა საქმე წინ. დიდი ალბათობით, დაასქმების ძველი სტრუქტურა აღარ დაბრუნდება. განსაკუთრებით ეს ოფისში მუშაობას, მას თავისი ისტორიული დატვირთვა არ ექნება. გვსურს თუ არა, მოგვიწევს, ცვლილებას ფეხი ავუწყოთ, შევეცადოთ და ვიყოთ ავანგარდში“, - ამბობს სოსო არჩვაძე. 

დისტანციური მუშაობის უპირატესობაზე საუბრობს ,,კომერსანტთან“ ეკონომისტი გივი მოცელიძე, რომელიც ამ მოდელის უარყოფით ფაქტორზეც ამახვილებს ყურადღებას, რაც ადამიანის სოციალიზაციას უკავშირდება.

,,საოფისე საქმიანობა პანდემიისას დიდწილად ონლაინ მუშაობამ ჩაანაცვლა და ეს ფორმა თანდათან პოპულარული ხდება. თუმცა ფაქტია, რომ ახალ გარემოებას ბევრი გამოწვევა ახლავს, როგორიცაა ადამიანის სოციალიზაციაა, რადგან დიდია ალბათობა, რომ დიდი ხნით ონლაინ მუშაობამ ამ მხრივ ნეგატიური გავლენა ჰპოვოს და ადამიანებმა ადამიანებს სოციალიზაციისათვის საჭირო უნარ-ჩვევები დაკარგონ. ცხადია, სწავლებაც და მუშაობაც ვირტუალურ გარემოშიც შეიძლება, მაგრამ აუცილებლად გასათვალისწინებელია ის გარემოებაც, რომ  ჩვენ წარმოვადგენთ განვითარებად ქვეყანას და ბევრს არ აქვს ინტერნეტთან წვდომა, რაც საბოლოო ჯამში, ბევრ ადამიანს უქმნის პრობლემას. მიუხედავად ამისა, მომავალში ამ მხრივ ბევრი რამ შეიცვლება, სფეროები, სადაც საქმის დისტანციურად შესრულება შესაძლებელია, ამ სტილს შეინარჩუნებენ, თუნდაც რესურსის დაზოგვის მიზნით“, - ამბობს მომცელიძე. 

შეგახსენებთ, რომ საქართველოში უწყებათაშორისი საკოორდინაციო საბჭოს გადაწყვეტილებით, როგორც საჯარო, ასევე კერძო სექტორის თანამშრომლების დიდი ნაწილი  პანდემიისას ონლაინრეჟიმში მუშაობდა.

დაახლოებით 1 წლის წინ კი ამოქმედდა პროგრამა „იმუშავე საქართველოდან“, რომელმაც 95-ზე მეტი ქვეყნის მოქალაქეს საქართველოში ჩამოსვლისა და აქედან დისტანციურად მუშაობის შესაძლებლობა მისცა.

 მარი ჩიტაია