4 წლის წინ ჩამონგრეული ვარკეთილის მეტროსადგურის შესაკეთებლად ტენდერი მეორედ გამოცხადდა. მიუხედავად იმისა, რომ ტექნიკური დავალება შეცვლილი არ არის, ფასი გაორმაგებულია - 18 იანვარს გამოცხადებული შესყიდვის სავარაუდო ღირებულება 7 057 389 ლარი იყო, ამჯერად თანხა 13 666 967 ლარს შეადგენს.

თბილისის სატრანსპორტო კომპანიაში განმარტავენ, რომ ბაზრის კვლევის ჩატარების შემდეგ აბსოლუტურად სულ სხვა თანხა გამოიკვეთა. „კომერსანტის“ კითხვაზე -  არის თუ არა გაორმაგებული ფასის მიზეზი ინფლაციის დონის რეკორდული ტემპით ზრდა, უწყებაში გვითხრეს, რომ ფასი სავარაუდოდ ამ მიზეზით გაიზარდა.

„ახალი ტენდერის გამოსაცხადებლად ბაზრის კვლევა კიდევ ერთხელ ჩატარდა, შესაბამისად რა თანხაც განისაზღვრა, შესყიდვა იმ ბიუჯეტით გამოცხადდა“, - განმარტავენ თბილისის სატრანსპორტო კომპანიაში.

სახელმწიფო შესყიდვაზე წინადადების მიღება 10 აპრილს დაიწყება და 15 აპრილს დასრულდება.

შეგახსენებთ, რომ სატენდერო დოკუმენტების მიხედვით დაგეგმილია მეტროსადგურის საზოგადოებრივი სივრცეების ინტერიერის რეკონსტრუქცია. ბუნებრივი ქვით მოპირკეთებული იატაკი  კერამიკული ფილებით იცვლება. ასევე კერამიკული ფილებით შეიცვლება კედლებზე გაკრული ქვის საფარი. მოხდება ბაქნისა და ესკალატორების გვირაბის აზბესტის ჭერის დემონტაჟი. სამუშაოები ითვალისწინებს თანამედროვე მასალებით ჭერის, ე.წ. დამცავი ქოლგის მოწყობას. პროექტის ფარგლებში დაგეგმილია განათებისა და შიდა სავენტილაციო სისტემის მოწყობა. ასევე კედლებზე განთავსდება საათი, ხოლო ქვედა დარბაზში დაიდგმება ნახევარწრის ფორმის სკამები.

განმარტებით ბარათის მიხედვით ირკვევა, რომ ინტერიერის დიზაინ-კონცეფცია წარმოადგენს 1960-იანი წლებისთვის დამახასიათებელი იდეების თანამედროვე გადამუშავებას, რაც საშუალებას იძლევა შეიქმნას ინდივიდუალიზებული სივრცე მრავალფეროვანი გეომეტრიული წყობისა და მოულოდნელი არაკლასიკური ფერთა შეხამების გამოყენებით.

შეგახსენებთ, რომ მეტროსადგურის რეაბილიტაცია დავით ნარმანიას მერობის დროს დაიწყო და 2017 წლის სექტემბერში დასრულდა.  ხუთ თვეში, 2018 წლის 30 იანვარს, ბაქანზე ჭერი ჩამოინგრა, რა დროსაც 4 ადამიანი დაშავდა. 4 წელზე მეტია რაც მეტროსადგურ „ვარკეთილის“ მოსაცდელი ბაქანი რკინის კონსტრუქციის ამარაა დარჩენილი. ჭერის ჩამონგრევის შემდეგ მეტროში დღემდე არაფერი შეცვლილა. აღსანიშნავია, რომ კითხვაზე — 2017 წელს განხორციელდა თუ არა „ვარკეთილის“ მეტრო სადგურის რეაბილიტაცია მოქმედი კანონმდებლობის შესაბამისად, ამ დრომდე პასუხისმგებელი უწყებებისგან მოსახლეობას პასუხი არ მიუღია.

ბაჩო ადამია