აშშ-ის პრეზიდენტი ჯო ბაიდენი მზადაა შეამციროს თავისივე ეკონომიკის მასტიმულირებელი პროგრამა და დაგეგმილი 3,5-ის ნაცვლად, პოსტპანდემიურ აღდგენაზე და დაზარალებულების დახმარებაზე 1, 9, ან სულაც 1,7 ტრლნ. დოლარი დაიხარჯება.
პროექტში შევა ყველაფერი, რაც დაგეგმილი იყო - სამედიცინო შეღავათები, შემწეობები ბავშვებზე, სუბსიდიები ქირის გადასახადზე და ა.შ., თუმცა, ყველაფერი ნაკლები იქნება - საბავშვო შემწეობების მოქმედების ვადა 3-დან 1 წლამდე მცირდება, სუბსიდიები და ჯანდაცვაზე ხარჯებიც დარჩება, მაგრამ შემცირდება.
კომპრომისი ჯო ბაიდენის მხრიდან დემოკრატიულ პარტიაში განხეთქილების გაღრმავებაზე პასუხი გახდა - პრეზიდენტის მიერ წარდგენილი კანონპროექტის მიღებას დემოკრატიული პარტიის მემარცხენე და მემარჯვენე ფრთას შორის უთანხმოება აფერხებს.
მემარცხენე დემოკრატებს ფინანსური დახმარების პაკეტის გაზრდა სურთ, ხოლო მემარჯვენეებს, ინფლაციის ზრდის შიშით, პირიქით, მიაჩნიათ, რომ ხარჯები უნდა შემცირდეს.
ბაიდენის ახალმა ინიციატივამ დაპირისპირებული მხარეების პოზიციები უნდა შეაჯეროს.
„მხარეები თანხმდებიან, რომ დრო არ ითმენს და სოციალური პაკეტის მიღება უმოკლეს ვადებში უნდა მოხდეს. ამავე დროს განახლებულ კანონპროექტში შენარჩუნებულია ყველა დასახული პრიორიტეტი“- განაცხადა თეთრი სახლი პრეს-მდივანმა ჯეინ ფსაკიმ.
დემოკრატიული პარტიის ფრაქციის თავმჯდომარემ ჩაკ შუმერმა განაცხადა, რომ შეხვედრაზე საყოველთაო თანხმობის ატმოსფერო იყო და მხარეები უმოკლეს ვადებში შეთანხმების მიღწევას შეეცდებიან.
გავრცელებული ინფორმაციით, შეხვედრის მონაწილეებმა რამდენიმე საკითხში კომპრომისს მიაღწიეს - კერძოდ, მნიშვნელოვნად შემცირდება პროგრამა, რომელიც სუფთა ენერგიის გამომყენებელ ენერგოკომპანიებს შეღავათებს, ხოლო „ბინძურ ენერგიაზე“ - ჯარიმებს აწესებს.
ამ ინიციატივაზე უარის თქმა არა მხოლოდ ფულის ეკონომიის სურვილის, არამედ მძლავრი „სანახშირო“ ლობის ძალისხმევის შედეგია.
გარდა ამისა, ენერგოკრიზისის ფონზე ალტერნატიული ენერგეტიკის მომხრეებიც კი მიხვდნენ, რომ ტრადიციული ენერგომატარებლების განდევნის დრო ჯერ არ მოსულა.
საყურადღებოა, რომ სუფთა ენერგეტიკის საკითხი მხოლოდ შიდაამერიკული დღის წესრიგით არ შემოიფარგლება - მალე ჯო ბაიდენი გაემგზავრება „კლიმატურ სამიტზე“ გლაზგოში, სადაც ატმოსფეროში მავნე გამონაბოლქვების შემცირების საკითხის განხილვა გაიმართება.
ეს სამიტი განსაკუთრებით მნიშვნელოვანია დღეს, სუფთა ენერგეტიკისთვის საკმაოდ რთულ პერიოდში, როდესაც ევროპაში და ამერიკაში ენერგოდეფიციტის პირობებში დახურული ნახშირის ელექტროსადგურების ამუშავება უწევთ.
ვაშინგტონმა თავის თავზე ათწლეულის ბოლოსთვის ატმოსფეროში მავნე ნივთიერებების გაფრქვევია 2-ჯერ შემცირების ვალდებულება აიღო. კვლევითი კომპანია Rhodium Group-ს მონაცემებით, ამის გაკეთება სრულიად შესაძლებელია მზის და ქარის ენერგიაზე ფორსირებული გადასვლის გარეშე - საკმარისია უკვე მოქმედი, ტრადიციულ ენერგიაზე მომუშავე გენერაციის ობიექტებისთვის ეკოლოგიური სტანდარტების გამკაცრება.
ბაიდენის ადმინისტრაცია ამ კუთხით აქტიურად მუშაობს. კერძოდ, საავტომობილო საწვავის მიმართ სტანდარტები გამკაცრდა და ასევე შეუზღუდა კონდიციონერებში და მსხვილ სამრეწველო მაცივრებში ეკოლოგიისთვის ძალზე საზიანო ჰიდროფტორნახშირბადების გამოყენება.
გარდა ამისა, დაგეგმილია გარკვეული ზომების მიღება საგაზო მრეწველობაში და ინფრასტრუქტურის ობიექტებში მეთანის გაჟონვის შემცირებისთვის.
მოკლედ, „ბინძური ენერგიის“ უარყოფის პოლიტიკა მისი მოწესრიგების და ეკოლოგიურად მაქსიმალურად უსაფრთხოდ გამოყენების სტრატეგიამ შეცვალა.
ეს გასაკვირი არცაა ენერგოკრიზისის ფონზე, რომლის ერთ-ერთი გამომწვევი მიზეზი სწორედ სუფთა ენერგიის ზედმეტად ფორსირებული დანერგვა გახდა.
Kommersant.ru