მგონია, რომ კორონავირუსის დროს თქვენმა პოლიტიკამ საქართველოს მოქალაქეებს ხელი შეუშალა იმ დახმარების მიღებაში, რომელიც ჩვენმა უცხოელმა მეგობრებმა მოგვცეს, - ასე მიმართა „გირჩის“ წევრმა ვახტანგ მეგრელიშვილმა ეროვნული ბანკის პრეზიდენტს, კობა გვენეტაძეს, რომელსაც პარლამენტში უსმენენ.

მან კობა გვენეტაძეს კითხვები ინფლაციასა და პანდემიის პირობებში საზღვარგარეთიდან მიღებულ დახმარებაზე დაუსვა.

„მე არ გახლავთ ფინანსისტი ან ეკონომისტი, მაგრამ მინდა თქვენთან გადავამოწმო ჩემი ცოდნა. მაგალითად, ინფლაციის შინაარსის, ტერმინის განმარტება მინდა გკითხოთ. თქვენს დოკუმენტში ამბობთ: - ის, რომ საზღვარგარეთ ფასები იზრდება სხვადასხვა საქონელზე, როგორიც არის საწვავი ან სასურსათო პროდუქტები, ეს გავლენას ახდენს ინფლაციაზეო. მე როგორ ვიცი ინფლაცია იცით? მე რომ ვყიდულობ ბენზინს და ჩემი ფული გადის, მე ცოტა ფული მრჩება ხინკლის საჭმელად. იმის გამო, რომ ხინკლის საჭმელად ცოტა ფული მრჩება, ეს ინფლაციაზე გავლენას ვერ მოახდენს. მე ასე ვისწავლე ინფლაციის შინაარსი, რომ ეს არის მთელი აგრეგატი. მინდა დამიდასტუროთ ან უარყოთ, რამდენად სწორად ვიცი.

მეორე კითხვა - ჩვენ რომ დაგვეხმარნენ პანდემიის პირობებში უცხოელები, თავისი ფული რომ გამოგვიგზავნეს, დოლარები, მე რომ ავიღო ეს დოლარი, შემიძლია წავიდე და რაღაც ვიყიდო ანუ, ახალი პროდუქტი ვიყიდო ამ ფულით, რომელიც მანამდე არ მქონდა. თქვენ რომ ეს დაარეზერვეთ და ახალი ლარები დაბეჭდეთ, ეგ რანაირი დახმარებაა? ის ფული რითაც დაგეხმარნენ, რეზერვებში გაქვთ დაგროვებული. კითხვა მაქვს, გამოვიყენეთ ეს ფული დასახმარებლად? თქვენი რეზერვი როგორ ნიშნავს დახმარებას. მგონია, რომ კორონავირუსის დროს თქვენმა პოლიტიკამ საქართველოს მოქალაქეებს ხელი შეუშალა იმ დახმარების მიღებაში, რომელიც ჩვენმა უცხოელმა მეგობრებმა მოგვცეს. ეს ფული თქვენ დაარეზერვეთ, ნაცვლად იმისა, რომ ამით მაგალითად, ლარი გეყიდათ“, - მიმართა მეგრელიშვილმა გვენეტაძეს.

საპასუხოდ, კობა გვენეტაძემ განმარტა, თუ რატომ ძვირდება მაგალითად, ხინკლის ფასი.

„იმ შემთხვევაში, თუ თქვენ ხინკალს მიირთმევთ და რითაც ის მზადდება, იმის ფასები გაიზრდება, ამ ფასების გაზრდასაც თავისი მიზეზები ექნება, მაგალითად, ფქვილის, ხორბლის ფასების გაზრდა. მოგეხსენებათ, ახლა ეს მაჩვენებლები ძალიან გაზრდილია. აქედან გამომდინარე, ამ პროდუქტის ფასიც გაიზრდება“, - განაცხადა გვენეტაძემ.

IPN.GE