კახეთის მიმართულებით ჩქაროსნული ავტომაგისტრალის მშენებლობა გრძელდება. პროექტი სახელმწიფო ბიუჯეტიდან ფინანსდება და მისი ჯამური ღირებულება 527 169 937 ლარია. ინფორმაციას ამის შესახებ საავტომობილო გზების დეპარტამენტი ავრცელებს.

უწყების ცნობით, ყველაზე მნიშვნელოვანი, 35 კმ-იანი მონაკვეთი თბილისიდან საგარეჯომდე ჩავა. ეს მონაკვეთი თბილისის კახეთთან დამაკავშირებელი ძირითადი მაგისტრალის და ასევე, აზერბაიჯანის ჩრდილო–დასავლეთ რეგიონთან დამაკავშირებელი სატრანზიტო დერეფნის ნაწილია. არსებული გზა მჭიდროდ დასახლებულ სოფლებსა და ქალაქებში გადის - ვაზიანი, სართიჭალა, ნინოწმინდა და საგარეჯო. ახალი გზა სრულად განტვირთავს მოძრაობას დასახლებულ პუნქტებში, რაც გააუმჯობესებს მოძრაობის უსაფრთხოების სტანდარტს და შეამცირებს მგზავრობის დროს.

„თბილისი-საგარეჯოს 35 კმ-იანი გზის მშენებლობა 3 მონაკვეთადაა დაყოფილია: ვაზიანის შემოვლითი გზა, ვაზიანი-საგარეჯოს მონაკვეთი და საგარეჯოს შემოვლითი გზა. ვაზიანის შემოვლითი გზის მშენებლობის 2023 წელს დასრულება, ხოლო დანარჩენი ორი მონაკვეთის დასრულება 2024 წელს იგეგმება. ეწყობა ყრილები, საფუძვლის ფენა, რკინიგზის სახიდე გადასასვლელები, ხელოვნური ნაგებობები და მიმდინარეობს ხიდების ხიმინჯების მშენებლობა.

პროექტით გათვალისწინებულია 4-ზოლიანი ცემენტ-ბეტონის გარე განათების სისტემით აღჭურვილი ჩქაროსნული გზის მშენებლობა, რაც, საერთაშორისო საგზაო უსაფრთხოების ნორმების დაცვით, 110 კმ საათში გადაადგილების საშუალებას მოგვცემს.

სამუშაოები მიმდინარეობს ასევე ბაკურციხე-წნორის შემოვლით, 16.6 კმ-იან გზაზე. გზა გვერდს აუვლის მჭიდროდ დასახლებულ წნორსა და 6 მიმდებარე სოფელს. პროექტი აზიის განვითარების ბანკის (ADB) მხარდაჭერით მიმდინარეობს და მისი ღირებულება 87.8 მილიონი ლარია.“— ნათქვამია უწყების განცხადებაში.