პროექტი „ახალგაზრდული მეწარმეობა სოფლის განვითარებისთვის“ განკუთვნილია 18-დან 35 წლის ჩათვლით ახალგაზრდებისთვის, რომლებიც ცხოვრობენ შიდა ქართლში, ქვემო ქართლში, მცხეთა-მთიანეთსა და სამცხე ჯავახეთში. მისი მიზანია ახალგაზრდებისთვის მეწარმეობის მიმართულებით ცოდნის მიწოდება, იდეების გენერირება, ბიზნეს-პროექტის შექმნა, შემდეგ დაფინანსების მოპოვება და სამეწარმეო საქმიანობის დაწყება.

როგორც რადიო „კომერსანტის“ ეთერში პროექტის დირექტორმა უჩა ვარამაშვილმა განაცხადა, საერთაშორისო დონორებიდან პროექტის ძირითადი დამფინანსებელია „ავსტრიის განვითარების თანამშრომლობა“, ასევე კომპანია Mercy Corps-ი, ხოლო პროექტის ადგილობრივი პარტნიორები არიან - „ლიბერთი ბანკი“ და სპორტის, ტურიზმის და ახალგაზრდობის საერთაშორისო ფონდი.

„ჩვენ ვიწყებთ ინფორმაციაზე ხელმისაწვდომობით, ვცდილობთ, რომ ყველა იმ ახალგაზრდას, ვინც არის თუნდაც ეთნიკური უმცირესობის წარმომადგენელი, დევნილი, მაღალმთიან ზონაში მცხოვრები, მივაწოდოთ ინფორმაცია ამ შესაძლებლობის შესახებ. შემდეგი ეტაპებია - მათი რეგისტრაცია, საბაზისო სამეწარმეო ტრენინგის ჩატარება, იდეების გენერირება, შერჩევა და ამის შემდეგ ყველაზე წარმატებული პროექტის ავტორები სიღრმისეულ სამეწარმეო ტრენინგის სწავლებაზე ხვდებიან და ამ პროცესში ექსპერტებთან ერთად მუშაობენ საკუთარი ბიზნეს-გეგმის განვითარებაზე. გამარჯვებულები კი ფინანსურ მხარდაჭერას იღებენ თავიანთი იდეების რეალიზებისთვის“, - განაცხადა უჩა ვარამაშვილმა.

მისი თქმით, პროექტის დაწყებამდე, სტატისტიკის ეროვნულ სამსახურთან თანამშრომლობით, ჩაატარეს კვლევა, რომელმაც აჩვენა რომ აღნიშნულ რეგიონებში, აღნიშნულ ასაკობრივ ჯგუფში, იყო არა მხოლოდ უმუშევრობის პრობლემა, არამედ მათ არც საგანმანათლებლო სერვისებზე ჰქონდათ წვდომა.

„საგანგაშო ციფრებია. ჩვენი პროექტი და ჩვენი პარტნიორების ჩართულობა არ არის საკმარისი და ვერ იქნება ამ პრობლემის გადამჭრელი. ჩვენ ვართ მოწოდებული იმისთვის, რომ ხელი შევუწყოთ პროცესების დაწყებას და გაუმჯობესებას. წინა ნაკადზე 700-მა ადამიანმა მიიღო პროექტში მონაწილეობა. ინტერესი მაღალია ქალებისგან. რეგისტრაცია ჯერ კიდევ მიმდინარეობს. მოვუწოდებთ ახალგაზრდებს, მიიღონ მონაწილეობა. დაახლოებით 800-ზე მეტი ახალგაზრდა ჩაერთვება ამ ფაზაში“, - განაცხადა უჩა ვარამაშვილმა.

მისი თქმით, პროექტის დაფარვის ზონაში 18 მუნიციპალიტეტია და ცდილობენ, რომ ადგილობრივი სამეწარმეო ეკოსისტემა განავითარონ.

„18 მუნიციპალიტეტია ჩვენი დაფარვის ზონა და ადგილზე 21 პარტნიორი ადგილობრივი ორგანიზაცია გვყავს და 36 ტრენერი ამ მუნიციპალიტეტებიდან და ვცდილობთ ადგილობრივი სამეწარმეო ეკოსისტემა განვავითაროთ“, - განაცხადა უჩა ვარამაშვილმა.

სპორტის, ტურიზმის და ახალგაზრდობის საერთაშორისო ფონდის დირექტორ მანანა ქავთარაძის თქმით, ძალიან მნიშვნელოვანია რომ ერთიანი პლატფორმა არსებობს, რომელიც ახალგაზრდების სამეწარმეო უნარების განვითარებას ემსახურება.

 „ბევრი წელი დაგვჭირდა, რომ მივსულიყავით ამ პროცესამდე, რომ ბიზნესის, არასამთავრობო და საერთაშორისო ორგანიზაციების ერთიანობით პლატფორმა შექმნილიყო, სადაც ახალგაზრდებს საშუალება ექნებოდათ, რომ მულტისექტორული მიდგომით რაღაც შედეგებზე გასულიყვნენ“, - განაცხადა მანანა ქავთარაძემ.