მოლოდინები, როდის დაიწყება ვაქცინაცია ამერიკაში და როგორ მიმდინარეობს მზადება - ამ საკითხებზე რადიო კომერსანტთან აშშ-ში მოღვაწე ქართველი ექიმი, ზურაბ გურული საუბრობს. მისი განცხადებით, ჰისპიტალური სექტორის გადატვირთვულობისგან დაცვა იყო აშშ-ს მთავარი სტრატეგია კოვიდ 19-თან ბრძოლის პირველი ტალღის დროს.

„აშშ-ში ველოდებით,რომ დეკემბრის ბოლოსთვის დაიწყება პირველი რისკ ჯგუფების ვაქცინაცია. ამერიკის ადმინისტრაციამ სერიოზული ინვესტიცია ჩადო ვაქცინის სწრაფად განვითარებისთვის. საუბარია სპეციალურ პროგრამაზე, რომლის ფარგლებშიც ადმინისტრაციამ Pfizer-ს 1.9 მილიარდი დოლარი გადაურიცხა.

ვაქცინების წარმოება საკმაოდ ზარალიანი ბიზნესია, შეიძლება არ გაამართლოს და უზარმაზარი თანხები წყალში ჩაიყაროს. იმისთვის,რომ ადმინისტრაციას წაეხალისებინა ფარმაკოლოგიური კომპანიები და დაეჩქარებინა ვაქცინის წარმოება, საკუთარ თავზე აიღო დაფინანსება და კომპანიას საჩუქრად 2 მილიარდი დოლარი მისცა. სანაცვლოდ, 30 მილიონი დოზა უნდა გადასცემოდა ამერიკას უფასოდ. მე ფედერალურ კლინიკაში ვმუშაობ და ოფიციალურად მოგვივიდა ბრძანება, რომ გავემზადოთ ვაქცინაციისთვის, რაც გულისხმობს ლოჯისტიკურ მზადებას. ადმინისტრაცია, სანამ გადადგება (მოგეხსენებათ რომ ინაუგურაცია 20 იანვარს არის) ცდილობს,რომ საკუთარ მემკვიდრეობაში ჩაწეროს ეს ნაბიჯი.

პირველმა ტალღამ როდესაც დაარტყა ამერიკას, იყო მაქსიმალური მცდელობა იმისა,რომ ნაკლები დატვირთვა ჰქონოდა ჰისპიტალურ სექტორს. ჰოსპიტალური სექტორი არის სასრული ტევადობა და თუ გადაიტვირთე ძალიან, შეუძლებელი იქნება მძიმე ავადმყოფების მიღება და ყველას დაკმაყოფილება.

ყველაზე დიდი პრობლემაა ის,რომ ჰოსპიტალური სექტორი კატასტროფული სისწრაფით იტვირთვება. ამ პაციენტების დიდი ნაწილი არ საჭიროებენ ჰოსპიტალიზაციას,“- აღნიშნავს ზურაბ გურული.