„ როგორც სოციალური გეგმა ნამდვილად იმსახურებს მოწონებას, თუმცა  კარგი იქნებოდა და ველოდებოდი ისეთ გადაწყვეტილებას, რომ ადგილობრივ წარმოებას გარკვეული შეღავათები ქონდეთ..“- ასე ეხმაურება ბიზნესმენი ედიშერ მამალაძე მთავრობის ანტიკრიზისულ გეგმას.

„მე ველოდებოდი ისეთ გადაწყვეტილებას, რომელსაც ევროპის ბევრ ქვეყანაში მოწონება მოჰყვა და რომლის მიხედვითაც,  ადგილობრივ წარმოებას გარკვეული შეღავათები გაუკეთდა. მსგავსი  შემოთავაზება არ მომისმენია და ამას ველოდები, ვნახოთ რა იქნება სამომავლოდ. იმედია ბიზნესთან შეხვედრას დაგეგმავენ და ერთად განვიხილავთ კონკრეტულ პაკეტებს. სხვა კომპონენტებს რაც შეეხება ნამდვილად კარგი ნაბიჯებია, გადადგმული.

ვიღაცისთვის შეიძლება 200 ლარის ცოტაა, თუმცა ეს არის ბიუჯეტის შესაბამისად გაწერილი თანხა. ყველა სახელმწიფო იქცევა ისე რისი საშუალებაც აქვს და განცხადებები, რომ ინგლისში ამერიკაში ან ირლანდიაში უფრო  დიდი დახმარებები რიგდება, არის არაგონივრული რადგან ჩვენ სხვა ქვეყნების მსგავსი ეკონომიკა არ გვაქვს. პროპორციული შედარება უნდა მოვახდინოთ იმ ქვეყნების და ჩვენი ქვეყნის ეკონომიკის და ამის შემდეგ შევადაროთ ერთმანეთს. „-ამბობს ედიშერ მამალაძე.

ბიზნესმენი „კომერსანტთან“ საუბრისას იმასაც აღნიშნავს, რომ ეკონომიკურზე მეტად გეგმა სოციალურს ეხება, რომელიც დღეს პირველ საფეხურზე დგას.

„დღეს ადამიანებს სჭირდებათ დახმარება და ეს კეთდება,  ბიზნესის დახმარებად კი მიმაჩნია ისიც, რომ უშემოსავლოდ დარჩენილი ადამიანი იღებს სახელმწიფოსგან დახმარებას.

თუმცა აუცილებელია მკაცრი შეზღუდვები გადაადგილებაზე მოიხსნას, რადგან მწარმოებლებს მოუწევთ იქირაონ ავტობუსები და უზრუნველყონ თავიანთი თანამშრომლების გადაადგილება, რაც დამატებით პროდუქციას  გააძვირებს. მე არ ვამბობ იმას, რომ ჰიგიენის ნორმები შეამსუბუქონ ის იგივე უნდა დარჩეს.“ -ამბობს ედიშერ მამალაძე.  

შეგახსნებთ, რომ 24 აპრილს  პრემიერ მინისტრმა ეკონომიკის გეგმა წარადგინა, რომლის მიხედვითაც კრიზისული მენეჯმენტისთვის ქვეყანა 3 მლრდ 500 მლნ ლარს დახარჯავს. აღნიშნულიდან მოქალაქეზე ზრუნვასა და მათ სოციალურ დახმარებაზე დაიხარჯება 1 მლრდ 35 მლნ ლარი, ეკონომიკაზე ზრუნვასა და მეწარმეობის მხარდაჭერაზე 2 მლრდ 110 მლნ ლარი, ხოლო ჯანდაცვის სისტემის გაძლიერებასა და პანდემიასთან ბრძოლაში 350 მლნ ლარი.

ნათია ლომიძე