იტალიის მთავრობა ვენეციის ნავსადგურში დიდი გემების შესვლის აკრძალვის გამო, საკრუიზო კომპანიებს კომპენსაციის სახით 57,5 ​​მლნ ევროს გადაუხდის. ინფორმაციას The Local ავრცელებს.

ახალი წესები ძალაში აგვისტოში შევიდა, რაც წლობით მიმდინარე კამპანიას მოჰყვა, რომ გიგანტური ლაინერები UNESCO-ს მსოფლიო მემკვიდრეობის ძეგლის სტატუსის ქალაქს გამოუსწორებელ ზიანს აყენებდნენ.

ინფრასტრუქტურის სამინისტროს განცხადებაში ნათქვამია, რომ მიმდინარე წელს, დაახლოებით, 30 მლნ ევრო არის გამოყოფილი საკრუიზო კომპანიებისთვის, რომლებმაც „მარშრუტების შეცვლისა და მგზავრებისთვის გაუქმებული რეისებით მიყენებული ზარალის ანაზღაურების გამო, ხარჯები გასწიეს“. დამატებითი 27,5 მლნ ევროდან, 5 მლნ ევრო წელს, დანარჩენი კი 2022 წელს ტერმინალის ოპერატორსა და მასთან დაკავშირებულ კომპანიებზე გამოიყოფა.

ვენეციის ცენტრში დიდი საკრუიზო გემების გადაადგილებაზე აკრძალვის გადაწყვეტილება იტალიის მთავრობამ UNESCO-ს სხდომამდე რამდენიმე დღით ადრე მიიღო. სხდომაზე უნდა განეხილათ გადაშენების პირას მყოფი მემკვიდრეობის ძეგლთა სიაში ვენეციის დამატების საკითხი, რასაც UNESCO საკრუიზო გემებთან დაკავშირებით იტალიის მთავრობის უმოქმედობას აბრალებდა.

მთავრობის გეგმის მიხედვით, საკრუიზო გემებს ვენეციაში შესვლა სრულად არ ეკრძალებათ, თუმცა უდიდესი გემები სან მარკოს აუზს, ასევე, სან მარკოსა და ჯუდეკას არხებს ვეღარ გაივლიან. ამის ნაცვლად, ისინი მარგერას სამრეწველო პორტში შევლენ. თუმცა გეგმის ზოგიერთი ასპექტი გაურკვეველი რჩება, რადგან მარგერას პორტის ინფრასტრუქტურა ჯერ კიდევ მშენებლობის პროცესშია.

ამჟამად სან მარკოსა და ჯუდეკას არხებზე მხოლოდ მცირე ზომის საკრუიზო გემები ოპერირებენ.

bpn.ge