„ვერც ეს და ვერანაირი სხვა მთავრობა ლარის კურსს მოკლევადიან პერსპექტივაში ვერაფრით გაამყარებს“, - ამის შესახებ „კომერსანტს“ ეკონომიკის ყოფილმა მინისტრმა გიორგი ქობულიამ განუცხადა.

მისი თქმით, ლარის კურსის გაუფასურების ძირითადი ფაქტორი არის ის, რომ ჩვენ ტოტალურად ჩაგვივარდა ეკონომიკის ძირითადი სექტორი - ტურიზმი, რომელსაც დოლარი შემოჰქონდა.

„დოლარი რომ ბევრად ნაკლები შემოდის, რა თქმა უნდა, ეს ლარისთვის უდიდესი დარტყმაა. ნახტომებით გაუფასურება და გამყარება დღეების განმავლობაში იმის შედეგია, რომ ვალუტის პატარა ბაზარი გვაქვს და რაღაც მომენტში, ლარის გაყიდვა ან ყიდვა დიდი ორგანიზაციის მიერ, იწვევს ასეთ ნახტომებს. თუმცა, ამას დიდი მნიშვნელობა არ აქვს. ფუნდამენტალურად, არ უნდა შევხედოთ ერთი, ორი და სამი თვის შედეგებს, არამედ უნდა ვნახოთ გასაშუალებული შედეგები წლების განმავლობაში.

ლარი საშუალოდ გაუფასურებული იქნება, ეკონომიკა ჩავარდნილია და ასევე ძირითადი ვალუტის შემომტანი სექტორი ფაქტიურად აღარ არსებობს. ეს რთული საკითხია, ბევრს არ ესმის და ამით სპეკულირებს. ეროვნულ ბანკს არ აქვს არანაირი ბერკეტი, რომ ეს სიტუაცია აკონტროლოს. ეროვნულ ბანკს მხოლოდ ტაქტიკური ინსტრუმენტი აქვს, და არა ბერკეტი, ამიტომ ვერც ეს მთავრობა და ვერანაირი სხვა მთავრობა ლარის კურს ვერაფერით გაამყარებს მოკლევადიან პერსპექტივაში. ლარის კურსის გასწორება და გამყარება შესაძლებელია მხოლოდ ეკონომიკის ფუნდამენტური განვითარების შედეგად. საჭიროა აღდგეს ტურიზმი, შევქმნათ საწარმოები, გავიტანოთ საქონელი, დავასაქმოთ ხალხი - მხოლოდ ამის შემდეგ გამყარდება ლარი, დანარჩენს ვერაფერს გავაკეთებთ. თუ ვინმეს ჰგონია,რომ ეროვნულ ბანკს შეუძლია ვალუტა გაყიდოს და ამით ის საბოლოოდ გაამყაროს - ეს არის დიდი შეცდომა, ვალუტის გაყიდვა შესაძლებელია ტაქტიკურად, მცირე რაოდენობით. რეგულარული ვალუტის გაყიდვა ლარის კურსს გაამყარებს, მაგრამ თანხები სწრაფად დამთავრდება და როცა ეს მოხდება, ლარი დოლართან მიმართებაში 3.3 ან 3.4 კი არ გახდება, უცბად შეიძლება 30 ლარი აღმოჩნდეს“, - განაცხადა ქობულიამ.

ეკონომიკის ყოფილი მინისტრი თვლის, რომ ეროვნული ბანკი თავისი ინსტრუმენტებით ძალიან შეზღუდულია, იმისათვის რომ ეს სიტუაცია გამოასწოროს, ვინაიდან ეკონომიკური საქმიანობა ფუნდამენტურად ჩავარდნილია.

„რა პოლიტიკასაც მიჰყვება ეროვნული ბანკი თავის საფუძვლებში სწორი პოლიტიკაა. ინსტრუმენტები რომელსაც იყენებს ეროვნული ბანკი, არის რეფირანსირების საპროცენტო განაკვეთები - ეს არის ინსტრუმენტი რომელიც აკონტროლებს ფულის რაოდენობას ეკონომიკაში და იძლევა მხოლოდ ნაწილობრივ საშუალებას ინფლაციის კონტროლის. აქაც ძალიან შეზღუდულია ეროვნული ბანკი თავისი ინსტრუმენტებით, რომ ეს სიტუაცია გამოასწოროს, ვინაიდან ფუნდამენტურად ჩავარდნილია ეკონომიკური საქმიანობა. არ შემოდის ტურისტი, არ შემოდის ვალუტა და არ გვაქვს საწარმოები, რომლებიც დააკომპენსირებს ამ ჩავარდნას“, - განმარტავს გიორგი ქობულია.