„შესაბამისობის სერტიფიკატის მოთხოვნა სწორი გადაწყვეტილებაა, უბრალოდ ცოტა ადრე უნდა გაეფრთხილებინათ, რომ ხალხს მომზადება მოესწრო“, - ამის შესახებ „კომერსანტთან“  „ჯაყელების მარნის“ მფლობელმა ზაზა ჯაყელმა ისაუბრა. ზაზა ჯაყელის თქმით, დახლებზე ძალიან ხშირად ხვდება გაურკვეველი წარმომავლობის ღვინო, რომელიც მთლიანობაში უტეხს სახელს ღვინის სექტორს.

„ერთადერთი აქ დროის ფაქტორია, სხვა შემთხვევაში სწორი გადაწყვეტილებაა, რადგან ძალიან ბევრი ისეთი ღვინო იყო დახლზე, რომელიც არავინ არ იცოდა საიდან მოდიოდა, მერე ფაქტორი არის ის, რომ შემდეგ ცუდი ღვინო სახელს უტეხს მთლიანად ქვეყანას და არა რომელიმე მეღვინეს. მე ვფიქრობ, რომ ყველა ღვინო ლაბორატორიულად შემოწმებული უნდა იყოს, მე პრობლემა  არ  მაქვს, რადგან ჩემი ღვინო, რომელიც ექსპორტზე გადის, ადგილობრივ  დახლებზეც იგივეა წარმოდგენილი. ამიტომ ეს საბუთი მე ავტომატურად მაქვს აღებული“, - აღნიშნა ზაზა ჯაყელმა.

შესაბამისობის  სერტიფიკატის მოთხოვნას დადებითად აფასებს „ნათენაძის ღვინის მარნის“  დამფუძნებელი გიორგი ნათენაძეც, მისი თქმით, აღნიშნული გადაწყვეტილება უფრო ადრეც უნდა ამოქმედებულიყო.

„ამისთვის ნებისმიერი მარანი მზად უნდა იყოს, პროცესი ცოტა ადრეც უნდა დაწყებულიყო, ვფიქრობ, რომ  ეს ხარისხის კონტროლისთვის მნიშვნელოვანია“, -აღნიშნა გიორგი ნათენაძემ.

შეგახსენებთ, რამდენიმე დღის წინ ღვინის ეროვნული სააგენტოს თავმჯდომარე და სურსათის ეროვნული სააგენტოს უფროსი ალკოჰოლიანი სასმელების სარეალიზაციო ქსელების წარმომადგენლებს შეხვდნენ და ადგილობრივ ბაზარზე რეალიზაციისთვის განკუთვნილი, საქართველოში წარმოებული ალკოჰოლიანი სასმელების სავალდებულო სერტიფიცირების  საკითხები განიხილეს. როგორც შეხვედრაზე ითქვა, სავაჭრო ქსელების წარმომადგენლები ვალდებულები არიან მწარმოებლებს შესაბამისობის სერტიფიკატი მოსთხოვონ და ისე მოახდინონ რეალიზაცია. პროდუქციის შესაბამისობის სერტიფიკატს სსიპ ღვინის ეროვნული სააგენტო აკრედიტებული ლაბორატორიის მიერ გაცემული ოქმის საფუძველზე გასცემს.