საქართველოში ეპიდემიოლოგიური მდგომარეობა დღითიდღე უფრო რთულდება. 16 ნოემბერს კოვიდით გარდაცვლილების რაოდენობა ერთ-ერთი ყველაზე მაღალი იყო - ბოლო 24 საათის განმავლობაში ვირუსს 83 ადამიანი ემსხვერპლა. ხელისუფლების მიერ გადადგმული ნაბიჯები ვირუსთან ბრძოლაში არაეფექტური აღმოჩნდა - რამდენჯერმე ამოქმედებულმა ლოკდაუნმა, დახურულმა დაწესებულებებმა და გაჩერებულმა ტრანსპორტმა შედეგი ვერ გამოიღო. ჩავარდა ვაქცინაციის პროცესიც, ქვეყანაში სამიზნე მაჩვენებელზე 2.5-ჯერ ნაკლები ადამიანია აცრილი. ვინ იღებს პასუხისმგებლობას ასეთ მდგომარეობაზე? „კომერსანტი“ გთავაზობთ ინტერვიუს პარლამენტის ჯანდაცვის კომიტეტის თავმჯდომარის მოადგილე ლადო კახაძესთან.
— გარდაცვლილების რიცხვი ყოველდღე იზრდება, როგორ აფასებთ ქვეყანაში შექმნილ რთულ ეპიდემიოლოგიურ მდგომარეობას?
— ძალიან შემაშფოთებელი რიცხვია. შესწავლა მიმდინარეობს და პასუხი ყველა კითხვას გაეცემა. ჩვენისთანა პატარა ქვეყნისთვის, ინფიცირებულთა რაოდენობა ძალიან ბევრია, შესაბამისად გართულებაც მეტია. შექმნილი ვითარებიდან ერთადერთი ძირითადი გამოსავალი არის აცრა და რეგულაციების დაცვა.
— დღევანდელი მონაცემებით, მოსახლეობის დაახლოებით 26%-ია აცრილი. თქვენი აზრით, რატომ არის ქვეყანაში სამიზნე მაჩვენებელზე 2.5-ჯერ ნაკლები ვაქცინირებული?
— ეს არის თავსატეხი, ამაზე ვფიქრობთ დღე და ღამე, რა დავაკელით, რას ვერ ვეუბნებით და სად გადაგვეღობნენ ანტივაქსერები. ჩვენ მოსახლეობას არ მოკლებია ინფორმაცია ვაქცინაციის სიკეთის შესახებ, ამას დაემატა წახალისება უამრავი ფორმით. მე ინფორმაციის მიწოდებას არავის დავზარდები, ჩემს ირგვლივ მყოფ ყველა ადამიანს ვუყვები, ვაჩვენებ ვაქცინაციის დადებით შედეგებს. ბევრი ამბობს რომ აცრა სავალდებულო უნდა იყოს, თუმცა ვალდებულებად მე საკუთარი თავი და ჩემი ოჯახის წევრების აცრა ჩავთვალე.
— საქართველოს პრეზიდენტმა ხელისუფლებას კორონავირუსის საწინააღმდეგოდ და მოსახლეობის ვაქცინაციის მაჩვენებლის გასაზრდელად მკაცრი ზომების გატარებისკენ, მათ შორის გარკვეული ჯგუფებისთვის სავალდებულო აცრისკენ მიუწოდებს. როგორ ფიქრობთ, უნდა იყოს თუ არა აცრა სავალდებულო?
— სავალდებულო აცრის მოწინააღმდეგე ვარ. სავალდებულო ნიშნავს, რომ ადამიანს არაფრად არ თვლი და ცხვრის ფარაა. მე მინდა ის გონიერი ადამიანი იყოს, მინდა რომ ჭკვიანი იყოს, ზნეობრივი ადამიანი იყოს, კეთილად განწყობილი იყოს სამყაროს მიმართ.
— მოლოდინში ერთი მასწავლებელი ათობით მოსწავლეს აინფიცირებს, ამ შემთხვევაში როგორია თქვენი აზრი?
— ასეთი მასწავლებელი სკოლაში არ უნდა შეუშვა. სწორედ ამიტომ გავაკეთეთ კოვიდ პასპორტები. ამის საპირწონე გზაა ის, რაც მსოფლიომ შემოიღო. ასეთ ადამიანს არ უნდა მივცეთ სხვისი ინფიცირების შესაძლებლობა. თავის თავს რასაც გაუკეთებს, გაუკეთოს. რა გავაკეთოთ? სხვა გამოსავალი არ გვაქვს. როდესაც მშობლები მეკითხებიან გაუშვან თუ არა ბავშვები სკოლაში, ვპასუხობ რომ თუ მასწავლებლების 80% აცრილი არ არის და საფრთხე არის ვირუსის გავრცელების, არ წაიყვანონ. ასევ ვეუბნები, რომ თუ თვითონ არ არის აცრილი, სკოლა მის შვილს არ მიიღებს. სხვა გზა არაა, ჩვენ უნდა ვიმოქმედოთ, ყველანაირი ხერხი ვცადეთ, შეგონება ვცადეთ, ახლა ეკონომიკური ბერკეტები ჩაირთვება.
— რა ხდება კოვიდსაავადმყოფოებში, თუ დაინტერესებულა ჯანდაცვის კომიტეტი აღნიშნული საკითხით?
— ნებისმიერი საკითხი, რომელიც მთავრდება ლეტალურად, შესწავლის საგანი უნდა იყოს და ამაზე პასუხს ჯანდაცვის სამინისტრო აგებს. რასაკვირველია, კითხვები არსებობს და პასუხები ჩვენც გვაინტერესებს. მე საბჭოს წევრი ვარ, მივდივარ და იქ განვიხილავთ ამ საკითხს. თქვენ თუ გაინტერესებს კომიტეტის ჩართულობა და ვინმეს თუ ჰგონია, რომ ფეხი ფეხზე გვაქვს გადადებული და ამით შეწუხებულები არ ვართ, ძალიან ცდება. ჩვენ აქტიურად ვართ ჩართული ინფორმაციულ უზრუნველყოფაში, თავის კომპეტენციის ფარგლებშიც რაც შეუძლია სამინისტროს, ამ ინფორმაციას თავს უყრის. დამუშავების შემდეგ კი ყველასთვის ცნობილი ხდება.
— შეხვედრების შემდეგ რა პასუხს იღებთ ჯანდაცვის სამინისტროს წარმომადგენლებისგან?
— ეს არის პირდაპირი ბმა იმ ტალღასთან, რომელიც არის გამოწვეული ადამიანების დიდი რაოდენობის ინფიცირებით. ეს არის ერთადერთი პასუხი, რომელსაც ვიღებთ. ჩვენ რომ გვაქვს 82 გარდაცვალება — იმ ტალღის ნაწილია, რომელიც ამ დაავადებამ გამოიწვია. ეს ციფრი შეიძლება ზევით ავიდეს, იმ შემთხვევაში თუ ინფიცირების ყოველდღიური მაჩვენებელი 7000-ს გადასცდა. ამ დაავადებას თავის გართულებები აქვს, რაც მერე ვლინდება. სამწუხაროდ ციფრებზე მიწევს საუბარი, როდესაც საქმე სიცოცხლეს ეხება და ამისთვის მკითხველს ბოდიშს ვუხდი.