აშშ-ის ვიცე-პრეზიდენტმა მაიკ პენსმა ოფიციალურად დაადასტურა, რომ არ აპირებს გამოიყენოს კონსტიტუციის 25-ე შესწორება პრეზიდენტის თანამდებობიდან დონალდ ტრამპის ჩამოსაშორებლად. მაიკ პენსმა უარი წერილობით აცნობა კონგრესის წარმომადგენელთა პალატის დემოკრატ სპიკერს, ნენსი პელოსის.
ვიცე-პრეზიდენტი წერს, რომ პრეზიდენტის უფლებამოსილების ამოწურვამდე რვა დღით ადრე, დემოკრატების ფრაქცია მისგან და მთავრობისგან მოითხოვს 25-ე შესწორების გამოყენებას, რაც პენსის შეფასებით, პოლიტიკური თამაშია და საშინელ პრეცედენტს შექმნის. ვიცე-პრეზიდენტი მიიჩნევს, რომ მსგავსი კურსი არ პასუხობს ერის ინტერესებს და არ შეესაბამება კონსტიტუციას.
მაიკ პენსმა კანონმდებლებს მოუწოდა, თავი შეიკავონ ქმედებისგან, რომელიც საზოგადოებას კიდევ უფრო გახლჩეს და ხელი შეუწყონ ტემპერატურის დაწევას და ქვეყნის გაერთიანებას.
წარმომადგენელთა პალატაში უმრავლესობით მყოფმა დემოკრატებმა ვიცე-პრეზიდეტ პენსს 11 იანვარს მიმართეს, გამოეყენებინა კონსტიტუციის 25-ე შესწორება, რომელიც პრეზიდენტის ქმედუუნაროდ გამოცხადების და გადაყენების საშუალებას იძლევა. თანხმობის შემთხვევაში, 20 იანვრამდე, ახალარჩეული პრეზიდენტის, ჯო ბაიდენის ინაუგურაციამდე პრეზიდენტის მოვალეობას მაიკ პენსი შეასრულებდა.
ვიცე-პრეზიდენტის უარის შემდეგ, წარმომადგენელთა პალატა თავად დაიწყებს დონალდ ტრამპის იმპიჩმენტის პროცედურას.
დემოკრატებმა პრეზიდენტ ტრამპის უფლებამოსილების ამოწურვამდე ცოტა ხნით მისთვის უნდობლობის გამოცხადება მოითხოვეს მას შემდეგ, რაც 6 იანვარს, დონალდ ტრამპის მომხრეები კაპიტოლიუმის შენობაში შეიჭრნენ და მოითხოვდნენ, რომ კონგრესს არ ეღიარებინა 2020 წლის 3 ნოემბრის არჩევნებში ჯო ბაიდენის გამარჯვება. მასობრივი არეულობების შედეგად 5 ადამიანი დაიღუპა.
დემოკრატები რესპუბლიკელ პრეზიდენტს ადანაშაულებენ ამბოხებისკენ წაქეზებაში და მიიჩნევენ, კაპიტოლიუმში შეჭრა იყო პირდაპირი შედეგი ტრამპის მორიგი განცხადებისა, რომ არჩევნები გაყალბდა და შედეგს არ აღიარებს.
12 იანვარს დონალდ ტრამპმა განაცხადა, მის წინააღმდეგ შეთითხნილი იმპიჩმენტი აშშ-ის ისტორიაში ყველაზე სასტიკი „კუდიანებზე ნადირობის“ გაგრძელებაა, რაც რისხვას და უთანხმებას იწვევს და ქვეყნისთვის საშიშია. ტრამპის თქმით, მას ძალადობისკენ არავისთვის მოუწოდებია: „ჩვენ გვჯერა კანონის უზენაესობის და არა ძალადობის, ან არეულობის“.
www.radiotavisupleba.ge