Sony-ს აქციების ფასი 1 თვეში რეკორდული 14%-ით გაიზარდა, მათ შორის 9%-ით ამ კვირაში. ამ დროისთვის იაპონური გიგანტის ფასიანი ქაღალდების ღირებულება ოდნავ, 117-დან 115 დოლარამდე დაკორექტირდა, თუმცა, ანალიტიკოსები კომპანიის პერსპექტივებს დადებითად აფასებენ.

საკონსულტაციო კომპანია Cowen-ის ექსპერტები მიიჩნევენ, რომ ლეგენდარული იაპონური კონცერნი არასათანადოდ არის შეფასებული და მისი აქციები 22%-ით, 141 დოლარამდე გაძვირდება.

მათი აზრით, Sony გართობის ბაზარზე მოწინავე კომპანიაა, თუმცა მისი აქციების ფასის სამართლიან დონემდე ზრდას ხელს უშლის ის გარემოება, რომ კომპანია კონგლომერატია. მის ბიზნესში რამდენიმე რადიკალურად განსხვავებული მიმართულება შედის, რომელზეც Sony-ს პოზიციები განსხვავებულია. კომპიუტერული თამაშები, ელექტროტექნიკა, მუსიკა, ტელევიზია, კინო და ფინანსები.

სწორედ ამიტომ მისი აქციები უფრო იაფია, ვიდრე შეიძლება ყოფილiყო. თუმცა, ამავე დროს ასეთი ბიზნესის ასეთი დივერსიფიცირება მას სხვადასხვა ბაზრებზე პოზიციების შენარჩუნების საშუალებას აძლევს.

ზოგადად პანდემია ვიდეოთამაშების ინდუსტრიაზე დადებითად აისახა - 2020 წელს ამ ბიზნესის შემოსავალმა გლობალურ ბაზარზე 180 მლრდ. დოლარი შეადგინა, რაც 2019 წელთან შედარებით 20%-ით მეტია.

აგვისტოში Sony-მ კვარტალური მოგების ანგარიში გამოაქვეყნა, რომლის თანახმად 2021 წლის აპრილ-ივნისში კონგლომერატის შემოსავალმა 20,6 მლრდ. დოლარი შეადგინა, რაც გასული წლის ანალოგიურ პერიოდზე 15%-ით მეტია. საოპერაციო მოგება 24%-ით, 2,5 მლრდ.-მდე, სუფთა მოგება კი 9%-ით 1,9 მლრდ.-მდე გაიზარდა, რაც იაპონური გიგანტისთვის რეკორდული მაჩვენებლებია.

Sony-ს შემოსავლის ძირითადი წყაროს სწორედ PlayStation წარმოადგენს. ახალი მოდელის PlayStation 5-ს პრეზენტაცია 2020 წლის მაისში შედგა და უკვე ივლისისთვის 10 მლნ. მეტი აპარატი გაიყიდა, რაც სისწრაფის კუთხით კომპანიისთვის რეკორდული აღმოჩნდა.

საქმე იქამდეც კი მივიდა, რომ მოთხოვნამ მიწოდებას გადააჭარბა, რისი მიზეზიც გაყიდვების მაღალ მაჩვენებლებთან ერთად საერთაშორისო ბაზარზე ჩიპებს დეფიციტი გახდა.

მომგებიანობის  კუთხით  Sony-ს ტრადიციული სეგმენტი - ელექტროტექნიკა - ტელევიზორები, კამერები, სმარტფონები, და ა.შ მეორეა.

კონგლომერატს ასევე ოპტიმისტური მოლოდინები სამომავლოდაც აქვს - 2021 წლის ბოლოსთვის ვიდეოთამაშების მიმართულების შემოსავალი 26,7 მლრდ. საოპერაციო შემოსავალი კი - 2,9 მლრდ. დოლარამდე გაიზრდება.

სავარაუდოდ, Sony-ს აქციების ზრდა ახლო მომავალში შენელდება და ისეთი სწრაფი არ იქნება, როგორიც იყო, თუმცა, კომპანიის მაღალ ცნობადობა და შემოსავლიანობა მის აქციებს ნებისმიერი ინვესტორისთვის მიმზიდველს ხდის.

თუმცა, მისი მოგება მერყევია სხვადასხვა მიმართულებების განსხვავებული წარმატებულობის გამო - მაგალითად, ახალი ტექნოლოგიების შემოსვლამ შესაძლოა PlayStation-ს გარკვეული პრობლემები შეუქმნას, ხოლო ტელე-კინო მიმართულებას კონკურირება ისეთ გრანდებთან მოუწევს, როგორც Netflix და Disney.

მოამზადა თენგიზ აბლოთიამ

წყარო: Forbes.ru