სს „რუსთავის აზოტი“, რომელიც კავკასიის რეგიონში მინერალური სასუქებისა და ინდუსტრიული ქიმიკატების ერთ-ერთ ყველაზე მსხვილ საწარმოს წარმოადგენს, გაიყიდა. აღნიშნულის შესახებ ინფორმაციას BM.GE ავრცელებს. 

ირკვევა, რომ კომპანიის აქციათა 100% მისმა მესაკუთრე კომპანიამ - სს „ე უ ინვესთმენთსმა“ გაყიდა. მყიდველი სინგაპურში ბაზირებული მულტი-ნაციონალური საერთაშორისო კორპორაცია - Indorama Corporation - ის ქართული შვილობილი კომპანიაა.

Indorama მსოფლიოში ერთ-ერთ ყველაზე მსხვილი კონგლომერატია, რომელიც აერთიანებს მინერალური სასუქების, ინდუსტრიული ქიმიკატებისა და სხვადასხვა ქიმიური პროდუქტების მწარმოებელ საწარმოებს. კორპორაცია ფლობს 160-ზე მეტ საწარმოს მსოფლიოს 38 ქვეყანაში, მათ შორის ევროპის, აზიის, აფრიკის, ჩრდილოეთ და ლათინური ამერიკის კონტინენტებზე და დასაქმებული ჰყავს 45 000 ათასზე მეტი ადამიანი.

Indorama საქართველოში ერთ-ერთი ყველაზე მსხვილი სტრატეგიული ინვესტორია. კორპორაცია მომდევნო წლების განმავლობაში მნიშვნელოვანი ფინანსური რესურსის ინვესტირებას გეგმავს რუსთავის აზოტის საწარმოს მოდერნიზების, განვითარებისა და წარმოების გაფართოების მიმართულებით.

„რუსთავის აზოტის“ შესაძლო გასხვისებაზე ნოემბერში საჯარო განცხადება გაავრცელა ბიზნესმენმა რომან ფიფიამ, სადაც აცხადებდა, რომ ობიექტის შეძენისგან ინვესტორებს თავი შეეკავებინათ, რადგანაც მას მიაჩნია, რომ თავის დროზე მისი საკუთრების უფლება საწარმოზე უკანონოდ შეწყდა.

„როგორც ცნობილია, 2016 წლამდე გახლდით რუსთავში მდენარე მინერალური სასუქების მწარმოებელი საწარმოს - რუსთავის აზოტის ბენეფიციარი მესაკუთრე. ჩემი საკუთრების უფლება ამ საწარმოზე უკანონოდ შეწყდა სხვადასხვა ფიზიკურ და იურიდიულ პირთა არამართლზომიერი ქმედებების გამო. ამიტომ, ჩემი უფლებების დასაცავად და საკუთრების აღდგენის მიზნით დღემდე ვაწარმოებ დავებს/სამართლებრივ პროცედურებს სხვადასხვა იურისდიქციაში, მათ შორის საქართველოში.

ჩემთვის ცნობილი გახდა, რომ რუსთავის აზოტის ამჟამინდელ მესაკუთრეს/შპს „ე.უ. ინვესთმენთ“-ს და მათ უკან მდგომ პირებს, განზრახული აქვთ პირდაპირი თუ ირიბი გზით გაასხვისონ რუსთავის აზოტის აქტივები. წინამდებარე განცხადების მიზანია, საჯაროდ მოვუწოდო როგორც რუსთავის აზოტის გასხვისების ინტერესის უკან მდგომ, ისე მისი შეძენით დაინტერესებულ პირებს, რომ თავი შეიკავონ რუსთავის აზოტის გასხვისების მიზნით ნებისმიერი გარიგების/მანიპულაციების განხორციელებისაგან. ამგვარი გარიგებებით დაინტერესებული ნებისმიერი პირი ვერ განიხილება რუსთავის აზოტის აქტივების კეთილსინდისიერ შემძენად.

მსურს გავასაჯაროო ინფორმაცია იმასთან დაკავშირებით, რომ მე მივმართე საქართველოს ეროვნულ ბანკს, რათა მან თავისი საზედამხედველო უფლებამოსილებების ფარგლებში, ობიექტურად და მიუკერძოებლად გამოიკვლიოს საქართველოს ერთ-ერთი სისტემური ბანკისა და მისი უმაღლესი მენეჯმენტის თანამდებობის პირების როლი და ჩართულობა რუსთავის აზოტის მართლსაწინააღმდეგო დასაკუთრების სქემაში. ამასთან, ეროვნულ ბანკს წარვუდგინეთ არამართლზომიერ ქმედებათა ჯაჭვში მონაწილე პირთა მამხილებელი არაერთი საყურადღებო მტკიცებულება.

გამოვთქვავ იმედს, რომ საქართველოს ეროვნული ბანკი იმოქმედებს მისი მაღალი სტატუსის შესაბამისად და უახლოეს დროში მოახდენს სათანადო და ეფექტურ რეაგირებას.

დაინტერესებულ პირებს დამატებითი ინფორმაციისათვის შეუძლიათ მიმართონ იურიდიულ ფირმა “BLB“-ს, რომელიც იცავს და წარმოადგენს ჩემს ინტერესებს საქართველოში“, — აღნიშნულია განცხადებაში, რომელიც ბიზნესმენმა 28 ნოემბერს გაავრცელა.