შავი ზღვის ქაფშია, რომელიც აფხაზეთის სანაპიროებთან ბინადრობს, კატასტროფულად სწრაფად მცირდება. როგორც ოკუპირებულ აფხაზეთთან დაკავშირებული რუსული არხები წერენ, ამის ოფიციალური მიზეზი თურქი მეთევზეების ბრაკონიერული თევზჭერაა, არაოფიციალური  კი - აფხაზი ე.წ ჩინოვნიკების დაუდევრობა.

გავრცელებული ცნობით, თევზი ისე სწრაფად ქრება, რომ „რუსულ-აფხაზურმა კომისიამ“ წლევანდელი დაჭერის ლიმიტი 60-დან 35 ათას ტონამდე შეამცირა.

ოკუპირებული აფხაზეთისთვის, რომელიც მძიმე ეკონომიკურ მდგომარეობაშია, ქაფშიაზე თევზაობა მომგებიანი ბიზნესია. დაჭერილი თევზი მუშავდება ფქვილად, საკვებად, თევზის ცხიმად (ზეთად). ეს ყველაფერი შემდგომ ექსპორტზე გადის, რამაც 2021 წელს ოკუპირებულ აფხაზეთს თითქმის 260 მილიონი რუბლი მოუტანა.

თევზის რეწვა ასევე იზიდავს ბრაკონიერებს თურქეთის სანაპიროებიდან. აფხაზეთის ე.წ ხელისუფლებამ ოფიციალურად აუკრძალა თურქ მეთევზეებს  აფხაზეთის აკვატორიაში ბადეების ჩაკიდება, მეტიც, შავ ზღვის სანაპიროს აფხაზეთის ნაწილში ამის გამო რუსი მესაზღვრეები პატრულირებენ.

ოკუპირებული აფხაზეთთან დაკავშირებულ ტელეგრამ არხებზე წერენ, რომ ჯერ კიდევ არ არსებობს კანონი, რომელიც თევზჭერას არეგულირებს, რაც თურქ ბრაკონიერებს  თავის დაძვრენის საშუალებას აძლევს და ისინი მოქმედებენ ე.წ აფხაზეთის მოქალაქეების ან კომპანიების „საფარ ქვეშ“.