უნგრეთის პრემიერ-მინისტრმა ვიქტორ ორბანმა 19 ოქტომბერს თავის ფეისბუქ-გვერდზე განაცხადა, რომ ევროკავშირის ლიდერების სამიტზე ის მოუწოდებს მათ გადახედონ რუსეთის წინააღმდეგ სანქციების პოლიტიკას.

მისი თქმით, უნგრეთის ეკონომიკისთვის და უნგრული ოჯახებისთვის "ბრიუსელის წარუმატებელი სანქციები უკვე თითქმის აუტანელი ტვირთია".

"ევროკავშირის სამიტზე ჩვენ მოვითხოვთ ომის წინააღმდეგ სანქციების პოლიტიკის გადახედვას და მის გონივრულ საფუძვლებზე გადატანას", - თქვა მან.

კონტექსტი

24 თებერვალს უკრაინაში რუსეთის შეჭრის შემდეგ, დასავლეთის ქვეყნებმა რუსეთის წინააღმდეგ სანქციების რამდენიმე პაკეტი შემოიღო, ასევე დაიწყეს რუსულ ნავთობსა და გაზზე მასიურად უარის თქმა და მათი ალტერნატივის ძიება.

გაზაფხულზე უნგრეთმა რამდენიმე კვირის განმავლობაში დაბლოკა ევროკავშირის მეექვსე სანქციების პაკეტი, რომელიც მოიცავს ნავთობის ნაწილობრივ ემბარგოს. ზაფხულში ამ ქვეყნის ხელისუფლების წარმომადგენლებმა განაცხადეს, რომ უნგრეთს არ შეეძლო უარი ეთქვა რუსულ ნავთობზე და რომ "ეს ფიზიკურად შეუძლებელია".

ორბანმა 8 სექტემბერს განაცხადა, რომ ევროკავშირის სანქციები რუსეთის წინააღმდეგ უნდა გადაიხედოს.

26 სექტემბერს მან ფეისბუქზე დაწერა, რომ "ბრიუსელის ბიუროკრატებმა და ევროპულმა ელიტებმა გადაწყვიტეს სანქციების დაწესება", ხოლო "ევროპელებისთვის ეს არავის უკითხავს".

წყარო: https://realpolitika.ge/