შემცირებული რეალიზაცია და შესაბამისად, შემოსავლებიც - ასეთი იყო 2020 პანდემიური წელი „მადარტისთვის“. მიუხედავად იმისა, რომ შარშან კომპანია წაგებაზე არ გასულა, 2019 წელთან შედარებით, წმინდა მოგება თითქმის 1 მილიონზე ლარზე მეტით შეუმცირდათ.

როგორც „მადარტის“ (იურიდიული სახელწოდება შპს „არბო 2009“) კონსოლიდირებული ფინანსურ ანგარიშგებაში ვკითხულობთ, კომპანიამ 2020 წელს რეალიზაციიდან 21 174 665 ლარი მიიღო (2019 წელს - 25 376 154 ლარი), წლის მოგემამ კი 1 847 300 ლარი შეადგინა (2019 წელს - 2 988 553 ლარი).

ამასთან, ანგარიშგების მიხედვით, 2020 წლის 31 დეკემბრის მდგომარეობით „მადარტის“ აქტივები შეადგენდა 13 097 051 ლარს, კაპიტალი კი - 10 142 628 ლარს.

შპს „არბო 2009“ 2009 წლის 20 თებერვალს დაფუძნდა. კომპანია ფლობს შპს „მადარტდელივერს“, რომელიც პროდუქციის მიწოდების სერვისს ახორციელებს. შპს „არბო 2009“-ის დამფუძნებელი და 100%-იანი წილის მფლობელი 2020 წლის 31 დეკემბრის მდგომარეობით არის დავით ჭრელაშვილი.

ანგარიშგების მიხედვით, 2020 წელს კომპანიაში სულ დასაქმებული იყო 627 ადამიანი. „მადარტდელივერის“ საავტომობილო პარკი 70 მოპედისა და 10 მსუბუქი ავტომობილისგან შედგება.

როგორც ანგარიშგებიდან ირკვევა, კომპანია „არბო 2009“ საწარმოთა მე-2 კატეგორიაშია, რაც ნიშნავს, რომ კომპანიის აქტივების ჯამური ღირებულება 10 მილიონი ლარიდან 50 მილიონ ლარამდე; შემოსავალი 20 მილიონი ლარიდან 100 მილიონ ლარამდე; დასაქმებულთა საშუალო რაოდენობა კი 50-დან 250 ადამიანამდეა.

bpn.ge