მიმდინარე წელს, გასულ წელთან შედარებით, საქართველოდან ქათმის ხორცის (ახალი ან გაცივებული) როგორც ზოგადი, ისე ადგილობრივი ექსპორტი გაიზარდა. კერძოდ, საქსტატის მონაცემებით, 2022 წლის იანვარ-აპრილში, საქართველოდან 4,726 მლნ აშშ დოლარის (3,440 ტონა) პროდუქტი გავიდა, წინა წლის ანალოგიურ პერიდოში - 2,139 მლნ აშშ დოლარის (2,120 ტონა).

რაც შეეხება ადგილობრივ ექსპორტს (ადგილობრივი წარმოების), მიმდინარე წლის 4 თვეში 1,008 მლნ აშშ დოლარის (731.3 ტონა) ქათმის ხორცი გავიდა, ხოლო 2021 წლის იანვარ-აპრილში 204 ათასი აშშ დოლარის (175.1 ტონა).

აქვე აღსანიშნავია, რომ 2022 წელს, ქათმის ხორცი საქართველოდან ექსპორტირებულ ტოპ-10 საკვებ პროდუქტს შორის მოხვდა.

საქსტატის მონაცემებით, 2021, ასევე 2022 წლის 4 თვეში ქართული პროდუქტი სომხეთსა და აზერბაიჯანში გავიდა.

„ბიზნესპრესნიუსი“ დაინტერესდა, ვის ეკუთვნის კომპანიები, ვისაც შინაური ფრინველის, ახალი, გაცივებული ან გაყინული ხორცი საქართველოდან ექსპორტზე გააქვს.

საქსტატის მონაცემებით, ეს კომპანიებია: შპს ბესთ ფუდი, შპს დილის პროდუქტები, შპს პოულტრი ჯორჯია და შპს ჩირინა.

შპს ბესთ ფუდი - სამეწარმეო რეესტრის მიხედვით, კომპანია 2020 წელს დაფუძნდა. შპს ბესთ ფუდის 100%-ანი წლის მფლობელი და დირექტორი ლია ჯამერაშვილია.

შპს დილის პროდუქტები - 2010 წელს დაფუძნდა. ბოლო ამონაწერის მიხედვით, კომპანის 52,5% სეიშელის კუნძულებზე რეგისტრირებულ შეზღუდული პასუხისმგებლობის საზოგადოება „პოულტრი ინვესტმენტ გრუპს“ ეკუთვნის, ხოლო , 47.5% - დიდი ბრიტანეთისა და ჩრდილოეთ ირლანდიის გაერთიანებული სამეფოში რეგისტრირებულ შეზღუდული პასუხისმგებლობის პარტნიორობას „გრანდის თრეიდინგი“.

შპს დილის პროდუქტების მშობელი კომპანიაა შპს პოულტრი ინვესტმენტ გრუპი, რომელიც პაატა დუშუაშვილისა და ნაზი ლიპარტელიანის საკუთრებაშია. კომპანიის გენერალური დირექტორია გივი ლობჟანიძე.

შპს პოულტრი ჯორჯია - კომპანის 2010 წელს დაფუძნდა. სამეწარმეო რეესტრის მიხედვით, 100%-ანი წილი კვიპროსში რესგიტრირებულ სააქციო საზოგადოებას „პოულტრი ენტერპრაისის“ ეკუთვნის, გენერალური დირექტორია (წარმომადგენელი) - ზურაბ ჭუჭულაშვილი.

შპს ჩირინა - სამეწარმეო რეესტრში 2010 წელს დარეგისტრირდა. კომპანიის 100%-ანი წილის მფლობელი და დირექტორი რევაზ ვაშაკიძეა.

bpn.ge