ვის მფლობელობაშია საქართველოში არსებული ელექტროსადგურები - როგორც საერთაშორისო გამჭვირვალობა- საქართველოს კვლევაშია ნათქვამი საქართველოში არსებული 109 ჰესს 77 იურიდილი პირი ფლობს.
„საქართველოში არსებული 109 ჰესს 77 იურიდილი პირი ფლობს (ზოგიერთი იურიდიული პირი 2 და მეტი ჰეს-ის მფლობელია). 77 მფლობელიდან 49 კერძო ქართული კომპანია ან საქართველოს სახელმწიფოა. საქართველოში გამომუშავებული ელექტროენერგიის 61%-ს საქართველოს საკუთრებაში (კერძო და სახელმწიფო) არსებული ელექტროსადგურები გამოიმუშავებენ.
ელექტროენერგიის 13%-ს ჩეხური კომპანიის, კერძოდ, „ენერგო-პრო ჯორჯიას“ საკუთრებაში არსებული ჰეს-ები გამოუმუშავებენ, 7%-ს - უკრაინის მოქალაქეების საკუთრებაში არსებული ჰესები, 5%-ს - რუსეთის, ხოლო 3-3%-ს ესპანური და თურქული კომპანიების საკუთრებაში არსებული ჰესები.
ყველაზე მსხვილი ჰესის - „ენგურჰესის“ 100%-ის მფლობელი საქართველოს სახელმწიფოა.
ელექტროენერგიის გამომუშავებით მეორე ადგილზე მყოფ „ვარციხე ჰესის“ მფლობელი შპს „ჯორჯიან ამერიქენ ელოიზია“, რომელიც ლუქსემბურგშია რეგისტრირებული და მისი საბოლოო მფლობელები უკრაინელი ბიზნესმენები, გენადი ბოგოლიუბოვი და იგორ კოლომოისკი არიან. 551 მლნ კვტ საათის ჯამური გამომუშავებით მესამე ადგილზე სს „ხრამჰესი I“ და „ხრამჰესი II“ არიან. ამ ორი ჰეს-ის მფლობელი „გარდაბანი ჰოლდინგ ბ.ვ.“-ია, რომელიც რუსულ კომპანია „ინტერ რაოს“ შვილობილი კომპანიაა.
მოქმედი 5 თეს-იდან ყველაზე მსხვილი სადგურები - შპს „გარდაბნის თბოსადგური 1“ და შპს„გარდაბნის თბოსადგური 2“ სახელმწიფოს საკუთრებაშია. „გარდაბნის თბოსადგური 1“-ის 49%-ს „საპარტნიორო ფონდი“ ფლობს, ხოლო 51%-ს - „საქართველოს ნავთობისა და გაზის კორპორაცია“.
„გარდაბნის თბოსადგური 2“-ის 100%-ს კი „საქართველოს ნავთობისა და გაზის კორპორაცია“ ფლობს. კიდევ ერთ შედარებით მსხვილ თეს-ს - შპს „მტკვარი ენერჯის“ (279 მლნ კვტ საათი წლიური გამომუშავება) ჰოლდინგი „საქართველოს ინდუსტრიული ჯგუფი” ფლობს, რომლის მფლობელი კომპანია შპს „ჩემექსიმ ინტერნეშენალი“ მარშალის კუნძულებზეა რეგისტრირებული. აღნიშნული კომპანიის საბოლოო ბენეფიციარი საქართველოს მოქალაქე დავით ბეჟუაშვილია. თეს-ების მიერ გამომუშავებულ ელექტროენერგიაში 83% სახელმწიფო საკუთრებაში არსებულ სადგურებზე მოდის. „ქართლის ქარის ელექტროსადგური“ სააქციო საზოგადოება „ჯორჯია გლობალ იუთილითიზის“ საკუთრებაა, რომლის საბოლოო მფლობელი სს „ჯორჯია კაპიტალია“,“- ნათქვამია კვლევაში.