„ბოტასები არის ძალიან კარგად შენიღბული ფინანსური პირამიდა“ – ასე აფასებს საქართველოში პოპულარულ ე.წ. კრიპტოვალუტას ეკონომისტი კონსტანტინე მოსიძე, რომელიც რადიო „კომერსანტის“ გადაცემაში „პროფესიონალები“ იმყოფებოდა სტუმრად.
მისი განმარტებით, ბოტასი არის პირამიდის და კრიპტოვალუტის ერთგვარი ჰიბრიდი.
მიიღე ინფორმაცია უფრო სწრაფად „კომერსანტის“ Telegram-ზე.
„ზოგადად, მაგალითად რომ ავიღოთ ბიტკოინი, თუ ამ კრიპტოვალუტას ჩავკეტავთ და ახალ მყიდველებს არ შევუშვებთ ბაზარზე, ბიტკოინი გააგრძელებს არსებობას, ის არ არის პირამიდა. არსებული მყიდველები გააგრძელებენ ყიდვა–გაყიდვას. შეიძლება ფასი დაეცეს, მაგრამ ბიტკოინი არ ჩამოიქცევა“, – აღნიშნა კონსტანტინე მოსიძემ.
ბოტასს რაც შეეხება, ეკონომისტი ამბობს, რომ ბოტასს ყიდულობ ადამიანისგან GSD-ს მეშვეობით, რომელიც ამ ბოტასის კრიპტოვალუტაა. GSD–ს აქეშებთ და გამოგაქვთ თანხა. „ჩნდება კითხვა, თუ GSD–ს გიხდიან, იგი უნდა გაუფასურდეს, ვინაიდან ბევრი ადამიანი მივა, გამოიმუშავებს ამ ვალუტას და გაანაღდებს. იმისათვის, რომ ეს ვალუტა არ გაუფასურდეს, ბოტასის დეველოპერები ბევრ რამეს აკეთებენ. ერთ–ერთია ამ GSD–ს ე.წ. დაწვა, რაც ნიშნავს, რომ კრიპტოვალუტას აგზავნი ისეთ მისამართზე, საიდანაც ვეღარ დაბრუნდება, ანუ ხდება ცირკულაციიდან ამოღება. მეორეა ის, რომ ბოტასის არსებული მფლობელები GSD–ს ყიდულობენ თავისი ბოტასების დასააბგრეიდებლად. მაგრამ მთლიანობაში იმდენად ახლართულია ეს ყველაფერი, რომ საბოლოო ჯამში უნდა დავსვათ კითხვა: ვის სჭირდება შენი სირბილი? – თუ ამ კითხვაზე ვერ მივიღებთ სწორ პასუხს და არც არსებობს ამაზე პასუხი, ძალიან დიდი ალბათობით ვრწმუნდებით, რომ ეს არის ფინანსური პირამიდა“, – აღნიშნა ეკონომისტმა.
კონსტანტინე მოსიძე ამბობს, რომ მხოლოდ ერთ შემთხვევაში შეიცვლის აზრს ბოტასთან მიმართებაში და ეს მხოლოდ იმ შემთხვევაში მოხდება, თუ, მაგალითად, ამ კრიპტოვალუტის დეველოპერები გააფორმებენ კონტრაქტებს „ნაიკთან“, „ადიდასთან“, „რიბოკთან“ ან რომელიმე სხვა კომპანიასთან, რომლებიც გადაიხდიან ფულს ამ სირბილში და შემდეგ ეს ბული გადანაწილდება ბოტასის მომხმარებლებზე.
„ამ შემთხვევაში უკვე სიტუაცია იცვლება იმ მხრივ, რომ პირამიდა რჩება, მაგრამ დამკვეთები ფულს იხდიან რეკლამაში“, – აცხადებს კონსტანტინე მოსიძე.