„ვისოლ ჯგუფის“ პრეზიდენტის განცხადებით, კომპანიაში რებრენდინგის გადაწყვეტილება მიიღეს, რადგან სახელი „ვისოლი“ უფრო მეტად საწვავის ბიზნესთან ასოცირდება, ამ საქმიანობას კი მათ ჯგუფში მხოლოდ ბიზნესის მეოთხედი უკავია. ამის შესახებ სოსო ფხაკაძემ BMGtv-ის გადაცემა #რედაქტ2-ში ისაუბრა.

მან რებრენდინგის დეტალებზე ამ ეტაპზე არ ისაუბრა და აღნიშნა, რომ დღეს რებრენდინგზე მუშაობა მიმდინარეობს.

„ვისოლ ჯგუფმა“ ბიზნესის დივერსიფიკაცია წლების წინ დაიწყო. „ვისოლ პეტროლიუმი“ ჯგუფის ერთ-ერთი კომპანიაა. ბიზნესი ფინანსურ მაჩვენებელზეა ორიენტირებული. შესაბამისად, „ვისოლ პეტროლიუმზე“ დღეს ჩვენი ჯგუფის 25% მოდის, ფულის გენერაცია და სხვა ფინანსური მაჩვენებლები 75% სხვა კომპანიებზე მოდის, რომელიც საწვავთან საერთოდ არ არის დაკავშირებული.

ამის გამო ჩვენ რამდენიმე თვის წინ მივიღეთ გადაწყვეტილება, რომ თვითონ სიტყვა „ვისოლი“ არ ასახავს და განმარტავს ჩვენი ჯგუფის საქმიანობას, რამეთუ „ვისოლი“ საწვავთან არის დაკავშირებული და ამიტომ რაც არ უნდა მოხდეს, საწვავთან დაკავშირებული შეკითხვების ბენეფიციარი მე ვარ ხოლმე. ამიტომ ჩვენ რებრენდინგის გადაწყვეტილება მივიღეთ, რაც ჯერ დასრულებული არ არის და სულ მალე დასრულდება“, - განმარტა ბიზნესმენმა.

წყარო: bm.ge/