„ვითიბი ბანკი საქართველო“ იმ რუსულ ბანკებს შორის მოხვდა, რომლებზეც რუსეთის მიერ უკრაინაში განხორციელებული საომარი მოქმედებების გამო აშშ-ის, დიდი ბრიტანეთის, ევროკავშირისა და სხვა ქვეყნების მიერ დაწესებული სანქციები გავრცელდა. სანქცირებულმა ვითიბი ბანკმა საქართველოში ფიზიკური და იურიდიული პირების პორტფელი გაასხვისა. გარიგების შედეგად, საცალო პორტფელი „ბაზის ბანკმა“, მცირე და საშუალო ბიზნესის კი „ლიბერთიმ“ გადაიბარა.

ამ ეტაპისთვის არსებული ინფორმაციით, ჯამში 600 მილიონის ღირებულების საკრედიტო (300 მლნ.) და სადეპოზიტო (300 მლნ.) პორტფელი გადავიდა „ვითიბიდან“ „ლიბერთი ბანკში“. რაც შეეხება ფიზიკურ პირებს, საუბარია დაახლოებით 600 მილიონის მოცულობის სესხებზე და 500 მილიონის დეპოზიტებზე.
კომერციული ბანკების წმინდა მოგებამ 2021 წელს 2 მლრდ ლარს გადააჭარბა, აქტივებმა 60 მლრდ-ს, დეპოზიტების მოცულობამ 38 მლრდ-ს და დაკრედიტების მოცულობამ 43 მლრდ-ს. მსხვილი ბანკების გარდა, ზრდა შედარებით მცირე ბანკებმაც აჩვენეს.

მილიარდიანი საკრედიტო პორტფელის მქონე ბანკების რეიტინგი მთლიანი სესხების და მათი ზრდის მიხედვით 2021 წლის მონაცემებით, შემდეგი იყო:

თიბისი ბანკი - 2021 წლის IV კვარტალში მთლიანი სესხები 16,739,135,187 ლარი, წინა წლის ანალოგიურ პერიოდში კი 14,911,967,284 ლარი, ზრდა 12%.

საქართველოს ბანკი - 2021 წლის IV კვარტალში მთლიანი სესხები 15,385,154,749 ლარი, წინა წლის ანალოგიურ პერიოდში კი 13,331,727,056 ლარი, ზრდა 15%.

ლიბერთი ბანკი - 2021 წლის IV კვარტალში მთლიანი სესხები 1,975,000,866 ლარი, წინა წლის ანალოგიურ პერიოდში კი 1,672,980,140 ლარი, ზრდა 18%.

ვითიბი ბანკი ჯორჯია - 2021 წლის IV კვარტალში მთლიანი სესხები 1,551,884,375 ლარი, წინა წლის ანალოგიურ პერიოდში კი 1,410,036,128 ლარი, ზრდა 10%.

კრედო ბანკი - 2021 წლის IV კვარტალში მთლიანი სესხები 1,492,789,998 ლარი, წინა წლის ანალოგიურ პერიოდში კი 1,065,269,473 ლარი, ზრდა 40%.

პროკრედიტ ბანკი - 2021 წლის IV კვარტალში მთლიანი სესხები 1,354,159,163 ლარი, წინა წლის ანალოგიურ პერიოდში კი 1,379,372,357 ლარი, შემცირება 1.8%.

ბაზისბანკი - 2021 წლის IV კვარტალში მთლიანი სესხები 1,254,684,411 ლარი, წინა წლის ანალოგიურ პერიოდში კი 1,092,082,691 ლარი, ზრდა 18%.

თუმცა ცვლილებების შედეგად, TOP-5 ბანკის საკრედიტო რეიტინგიც იცვლება:

თიბისი - მთლიანი სესხები 16 მლრდ ლარზე მეტი;

საქართველოს ბანკი - მთლიანი სესხები 15 მლრდ ლარზე მეტი;

ლიბერთი ბანკი - მთლიანი სესხები 2.2 მლრდ ლარზე მეტი (1.97 მლრდ + 0.3 მლნ);

ბაზისბანკი - მთლიანი სესხები 1.8 მლრდ ლარზე მეტი (1.25 მლრდ +0.6 მლნ);

კრედო - მთლიანი სესხები 1.5 მლრდ ლარამდე.

ვითიბის ხელში ამჟამად 600 მილიონიანი ლარის პორტფელი რჩება. ძირითადად კორპორაციული, რომლის გასხვისებაზეც მოლაპარაკებები მიმდინარეობს.

ნინო თამაზაშვილი