უკრაინის პრეზიდენტმა ვოლოდიმირ ზელენსკიმ ბუნდესტაგის წინაშე სიტყვით გამოსვლისას გერმანიას უმოქმედობის გამო უსაყვედურა. ამის შესახებ ინფორმაციას უკრაინული საინფორმაციო სააგენტო UNIAN-ი ავრცელებს.
„როცა გითხარით, რომ „ჩრდილოეთის ნაკადი-2“ არის იარაღი და მზადება დიდი ომისთვის, პასუხად მივიღეთ - ბოლოს და ბოლოს, ეს არის ეკონომიკა. ეს იყო ცემენტი ახალი კედლისთვის“, - განაცხადა ზელენსკიმ.
მისი თქმით, გერმანია ახლაც აჭიანურებს უკრაინის ევროკავშირში გაწევრიანების საკითხს.
„როდესაც გკითხეთ, რა უნდა გაკეთდეს უკრაინაში, რომ გავხდეთ ნატოს წევრი, ვიყოთ უსაფრთხოდ, მივიღოთ უსაფრთხოების გარანტიები, პასუხად მოვისმინეთ: ასეთი გადაწყვეტილება ჯერ არ არის მაგიდაზე და არც იქნება უახლოეს მომავალში. თქვენ ახლა აჭიანურებთ უკრაინის ევროკავშირში გაწევრიანების საკითხს. გულწრფელად რომ ვთქვათ, ზოგიერთისთვის ეს პოლიტიკაა, მაგრამ სინამდვილეში ეს არის ქვები, ქვები ახალი კედლისთვის.
როდესაც ჩვენ ვითხოვეთ პრევენციული სანქციები, ჩვენ მივმართეთ ევროპას, ჩვენ მოგმართეთ თქვენ: სანქციები აუცილებელია ისეთი, რომ აგრესორმა იგრძნოს, რომ თქვენ ძლიერები ხართ. ჩვენ დავინახეთ დაგვიანება. ვიგრძენით წინააღმდეგობა, მივხვდით, რომ თქვენ გსურთ ეკონომიკის გაგრძელება“, - აღნიშნა უკრაინის პრეზიდენტმა.
როგორც სიტყვით გამოსვლის წინ, ისე მისი დასრულების შემდეგ ბუნდესტაგის წევრები უკრაინის ლიდერს ფეხზე წამოუდგნენ და ტაში დაუკრეს.