ორი საათის განმავლობაში ვისაუბრეთ და განვიხილეთ ბევრი საკითხი, მათ შორის სანქციები, იარაღის მიწოდება, ევროკავშირში გაწევრიანება და ფინანსური დახმარება, ასევე საკითხები, რომლებიც ჩვენ აუცილებლად დაგვჭირდება გამარჯვების შემდეგ ჩვენი ქვეყნის აღსადგენად, – ამის შესახებ უკრაინის პრეზიდენტმა ვოლოდიმირ ზელენსკიმ ევროპული საბჭოს პრეზიდენტ შარლ მიშელთან ერთად გამართულ პრესკონფერენციაზე განაცხადა.
მისივე თქმით, შარლ მიშელთან პირისპირ შეხვედრისას შეთანხმდნენ, რომ უკრაინა და ევროკავშირი მჭიდროდ ითანამშრომლებენ სამხედრო დანაშაულებებისა და კაცობრიობის წინააღმდეგ ჩადენილი დანაშაულების გამოსაძიებლად.
„ჩვენ გვესმის, რომ რუსეთს სურს, გაანადგუროს უკრაინელი ხალხი, ჩვენი სახელმწიფოებრიობა. ჩვენ გვაქვს ერთნაირი შეხედულებები, ეს არის ნამდვილი გენოციდი. დღეს თქვენ პირადად, თქვენს გუნდთან ერთად იმყოფებოდით ბოროდიანკაში და საკუთარი თვალით იხილეთ, რა ჩაიდინეს იქ რუსმა ოკუპანტებმა. ეს არის მნიშვნელოვანი პოლიტიკური სიგნალი. ჩვენ შევთანხმდით, რომ უკრაინა და ევროკავშირი მჭიდროდ ითანამშრომლებენ ამ სამხედრო დანაშაულებებისა და კაცობრიობის წინააღმდეგ ჩადენილი დანაშაულების გამოსაძიებლად. ჩვენ ვხედავთ, რომ რუსეთი არ წყვეტს სისხლისღვრას და სურს უკრაინელებისა და ჩვენი სახელმწიფოს განადგურება.
რუსეთის ძალებმა დაიწყეს ახალი, ფართომასშტაბური შეტევა დონბასში. ჩვენ გვესმის ეს ყველაფერი, ვხედავთ ყველა რისკს და ყველა ნაბიჯებს. ისინი განაგრძობენ სარაკეტო იერიშებს უკრაინის მთელ ტერიტორიაზე. მათ მხოლოდ მარიუპოლში, მძევლად ჰყავთ 120 ათასი ადამიანი. დანაშაულები, რომლებიც ხდება მარიუპოლში, ბევრად საშინელი და მასშტაბურია, ვიდრე ბოროდიანკაში. მე დარწმუნებული ვარ, ჩვენი ერთობლივი ქმედებებით ჩვენ შევძლებთ, პასუხი ვაგებინოთ ყველას დამნაშავეს და დარწმუნებული ვართ, რომ ყველას ვიპოვით“, – განაცხადა ზელენსკიმ.
როგორც ზელენსკიმ აღნიშნა, პირველ ყოვლისა, საჭიროა მაქსიმალურად გამკაცრდეს სასანქციო ზეწოლა და აღნიშნა, რომ ყველაფერი უნდა გაკეთდეს, რათა რუსეთს არ ჰქონდეს შესაძლებლობა, დააფინანსოს ეს სისხლისმღვრელი ომი.
„დღეს ჩვენ განვიხილეთ ის სფეროები, სადაც ევროკავშირს ჩვენი დახმარება შეუძლია იმისთვის, რომ შევაჩეროთ ეს ბარბაროსული ომი მშვიდობიანი უკრაინელი ხალხის წინააღმდეგ. პირველ ყოვლისა, საჭიროა მაქსიმალურად გამკაცრდეს სასანქციო ზეწოლა. ჩვენ ყველაფერი უნდა გავაკეთოთ, რომ რუსეთს არ ჰქონდეს შესაძლებლობა, დააფინანსოს ეს სისხლისმღვრელი ომი. ჩვენ მადლობელი ვართ ევროკავშირის სანქციების ხუთი პაკეტისთვის, თუმცა სამწუხაროდ, ჩვენი აზრით, გარკვეული საკითხები დასრულებული არ არის, რადგან ეს არ არის საკმარისი იმისთვის, რომ რუსეთის მხრიდან ომის დაფინანსების შეჩერება შეწყდეს. ჩვენ გვსურს, დამტკიცდეს სანქციების შემდეგი, მეექვსე ძლიერი პაკეტი. ჩვენ მოვუწოდებთ ევროკავშირს სრული ენერგეტიკული ემბარგოს გამოცხადებისკენ, მათ შორის ნავთობსა და გაზზე. ნავთობი აუცილებლად უნდა შევიდეს მეექვსე სასანქციო პაკეტში, ამის გარეშე ის არ იქნება საკმარისად მძლავრი, არამედ იქნება ცარიელი. საბოლოოდ, ყველა რუსული ბანკი უნდა გაითიშოს „სვიფტიდან“, მათ შორის „სბერბანკი“ და „გაზპრომბანკი“. უნდა დაბლოკოს რუსეთის სახელმწიფო კომპანიების ყველა ანგარიში და ეს ფული უნდა მოხმარდეს უკრაინის რეკონსტრუქციას. ყველა რუსმა მაღალჩინოსანმა და მათი ოჯახის წევრებმა საკუთარ თავზე უნდა იგრძნონ სანქციების მოქმედება და უკრაინის წინააღმდეგ ჩვენს უკრაინულ მიწაზე ომისადმი მათი პირადი მხარდაჭერის შედეგები“, – განაცხადა ზელენსკიმ.
როგორც უკრაინის პრეზიდენტმა აღნიშნა, ევროპელმა პარტნიორებმა მნიშვნელოვანი წვლილი შეიტანეს უკრაინის სამხედრო შესაძლებლობების მხარდაჭერაში.
„მეორე სფერო არის ის, რომ მნიშვნელოვანია უზრუნველყოფილი იყოს, რომ უკრაინას აქვს ყველა აუცილებელი თანამედროვე იარაღი. ჩვენ იარაღის საკითხს ბევრ ყურადღებასა და დროს ვუთმობთ. ევროპელმა პარტნიორებმა მნიშვნელოვანი წვლილი შეიტანეს ჩვენი სამხედრო შესაძლებლობების მხარდაჭერაში. მადლობელი ვარ 1,5 მილიარდი ევროსთვის, რომელიც გამოიყო ევროპული სამშვიდობო ფონდის ფარგლებში უკრაინის შეიარაღებული ძალების სამხედრო საჭიროებების დასაფინანსებლად. ჩვენ შევთანხმდით, რომ ამ თანხას მაქსიმალურად ეფექტიანად გამოვიყენებთ, რომ უკრაინამ მიიღოს სწორედ ის იარაღი, რომელიც სჭირდება. არა ყველა იარაღი, არამედ ის იარაღი, რომელიც ჩვენთვის პრიორიტეტულია, რომლის ნაკლებობასაც განვიცდით. ეს არის ძალიან მნიშვნელოვანი საკითხი, ძალიან მნიშვნელოვანი სიტყვები და აქცენტი. ჩვენ ეს იარაღი დროულად გვჭირდება და გვჭირდება ის, რაც მოთხოვნილია“, – განაცხადა ვოლოდიმირ ზელენსკიმ.
ვოლოდიმირ ზელენსკი
