უკრაინის პრეზიდენტმა ვოლოდიმირ ზელენსკიმ, „დიდი შვიდეულის“ ქვეყნების ფინანსთა მინისტრების შეხვედრაში მონაწილეობის წინა დღეს, საერთაშორისო სავალუტო ფონდის მმართველ დირექტორ კრისტალინა გეორგიევასთან ვიდეოკონფერენცია გამართა. ამის შესახებ ინფორმაციას უკრაინის პრეზიდენტის ადმინისტრაცია ოფიციალურ გვერდზე ავრცელებს.
მათივე ინფორმაციით, ზელენსკიმ საერთაშორისო სავალუტო ფონდს ომის რთულ პერიოდში უკრაინის ეკონომიკის მხარდაჭერისთვის მადლობა გადაუხადა.
„გმადლობთ, რომ დახმარების საკითხებსა და ამ სიტუაციის დაძლევაში ხართ ლიდერი“, - განაცხადა ზელენსკიმ.
უკრაინის პრეზიდენტის თქმით, უკრაინის სახელმწიფო ბიუჯეტის ყოველთვიური დეფიციტი დაახლოებით 5 მილიარდ აშშ დოლარს შეადგენს, ამიტომ მან სავალუტო ფონდს მოუწოდა, უკრაინის მხარდაჭერა დააჩქაროს. გარდა ამისა, ვოლოდიმირ ზელენსკიმ ხაზი გაუსვა პარტნიორი ქვეყნებისგან უკრაინის ფინანსური მხარდაჭერის მნიშვნელობას, მათ შორის, შეერთებული შტატების, კანადის, იაპონიისა და ევროკავშირის მხრიდან.
ზელენსკიმ საერთაშორისო სავალუტო ფონდს მოუწოდა, უკრაინის ომის შემდგომი აღდგენის პროგრამის შემუშავებაში აქტიური მონაწილეობა მიიღოს.
,,სადაც შეგვიძლია რეფორმების შედეგები ვაჩვენოთ, არ უნდა გავჩერდეთ და წინ წავიწიოთ. ომის გამო, ჯერ ყველაფერი არ არის შესაძლებელი, მაგრამ ჩვენ მზად ვართ ვაჩვენოთ მსოფლიოს, რომ წინ მივდივართ“, - დასძინა ზელენსკიმ.
თავის მხრივ, საერთაშორისო სავალუტო ფონდის მმართველმა დირექტორმა განაცხადა, რომ იგი ,,დიდი შვიდეულის“ ქვეყნებს საჭირო ფინანსური მხარდაჭერის დაჩქარების შესახებ ინფორმაციას მიაწვდის.