„ვუძლებთ, ესაა სადაზღვევო ბაზარის პირველი კვარტლის შეფასება. რთული წელი იქნება, ყოველ შემთხვევაში პოსტ კოვიდურ პერიოდში ვერ გადავალთ, მარტივი არ იქნება დავძლიოთ გასული წლის პრობლემები და წლევანდელი დაძაბული ვითარება“, - ამის შესახებ „კომერსანტს“ დაზღვევის ასოციაციის პრეზიდენტმა დევი ხეჩინაშვილმა განუცხადა.

მიიღე ინფორმაცია უფრო სწრაფად „კომერსანტის“ Telegram-ზე.

მისი თქმით, სექტორისთვის გადამწყვეტი მნიშვნელობა აქვს პასუხისმგებლობების სავალდებულო დაზღვევის გააქტიურებას, რომელიც მთელ მსოფლიოში მიღებული პრაქტიკაა.

„გადამწყვეტი მნიშვნელობა აქვს ავტომფლობელთან პასუხისმგებლობის სავალდებულო დაზღვევის ჩაშვებას. ცალკე უზარმაზარი მნიშვნელობა აქვს სიცოცხლის დაზღვევის საგადასახადო ხელშეწყობის პროექტს, რომელიც ტექნიკურად დაწერილია. ზოგადად, სხვადასხვა პასუხისმგებლობის სავალდებულ დაზღვევა მსოფლიოში აპრობირებულია, ჩვენთან კი კანონის მიღება ჭიანურდება.

გასულ წელს სადაზღვევო კომპანიების უმეტესობას ან მინიმალური მოგება ჰქონდათ ან საერთოდ ზარალზე იყვნენ. რაც შეეხება 2022 წლის პროგნოზებს, ჯერ კიდევ რთულია გათვლების გაკეთება, თუმცა მარტივი წელი არ იქნება“, - აღნიშნავს ხეჩინაშვილი.

„არდის“ გენერალურ დირექტორი მიხეილ ჯაფარიძეც „კომერსანტთან“ ამბობს, რომ სადაზღვევო სექტორისთვის მარტივი წელი არ იქნება.

„ვფიქრობ, 2022 წელი მარიტივი წელი არ იქნება. თუ პანდემია რეალურად დასრულდა კარგია, თუმცა გეოპოლიტიკური პროცესები, ინფლაციის ტემპი და რეცესიის რისკები, მაინც საკმაოდ მყიფე გარემოს ქმნის, რაც არ იძლევა დამაჯერებელი პროგნოზების გაკეთების შესაძლებლობას. თუმცა ბიზნესი უნდა ადაპტირდეს არსებული რეალობის შესაბამისად და პროდუქტიული იყოს იმ გარემოში, სადაც ოპერირებს“, - ამბობს მიხეილ ჯაფარიძე.

საქართველოს სადაზღვევო ჯგუფის ხელმძღვანელს და დაზღვევის კავშირის თანათავჯდომარე არჩილ მორჩილაძე განმარტავს, რომ 2022 წელი სავალალო იქნება და უფრო მეტად გაიზრდება კომპანიების ზარალიანობა.

„ინფლაცია ყოველთვის ახდენს გავლენას ჩვენს სექტორზე, როდესაც ის ასეთი მაღალია, ბუნებრივია, კომპანიებს ზარალიანობა უფრო დიდი ექნებათ და ეს წლის ბოლოს გამოჩნდება. ჩემი აზრით სადაზღვევო სექტორის მდგომარეობა სავალალო იქნება, ბევრი კომპანიისთვის ეს მძიმე დარტყმა იქნება“, - თქვა არჩილ მორჩილაძემ.

სადაზღვევო სექტორს მოგება შეუმცირდა და 2021 წელი მხოლოდ 40 მილიონი ლარის მოგებით დაასრულა, რაც პანდემიურ 2020 წელთან შედარებით 16%-ით ნაკლებია.

ნინო თამაზაშვილი