ხმაურის ფონზე მიმდინარეობდა წალენჯიხის საკრებულოს დღევანდელი სხდომა, სადაც საკრებულოს ახალი თავმჯდომარე უნდა აერჩიათ, თუმცა თუმცა ახალი მოწვევის საკრებულოს წევრებმა თავმჯდომარის არჩევა ვერ შეძლეს. მიზეზი აზრთა სხვადასხვაობა და პოლიტიკური შეხედულებებია.

დღევანდელ სხდომაზე, გახარიას პარტიამ საკრებულოს წევრებს ახალი მოდელი შესთავაზა, რის მიხედვითაც საკრებულოში თანამდებობები პარტიების რაოდენობის შესაბამისად უნდა გადანაწილდეს, რაც კატეგორიულად მიუღებელი აღმოჩნდა „ნაციონალური მოძრაობისთვის“.

მათი განცხადებით, წალენჯიხაშიც ჩხოროწყუს მოდელი უნდა გათამაშდეს, უმრავლესობა უნდა ჰყავდეს ოპოზიციას და არც ერთი წამყვანი თანამდებობა „ქართულ ოცნებას“. სწორედ ამ წინადადებას მოჰყვა პარტიებს შორის დაპირისპირება.

„ქართული ოცნების“ განცხადებით, ისინი მზად არიან პარტიებთან თანამშრომლობისთვის, თუმცა "ნაციონალური მოძრაობა" ცდილობს პროვოკაციების მოწყობას და საკრებულოს მუშაობის კრიზისში შეყვანას.

გახარიას პარტიის ინიციატივა ასევე მიუღებელია „ლელოსთვის“, რომელიც თანამდებობების გადანაწილების ახალ მოდელს სთავაზობს პარტიებს. „ლელოს“ მტკიცებით, ეს მოდელი დაეხმარება საკრებულოს დაბალანსებულ მუშაობაში. პარტიები შეთანხმდნენ, რომ „ლელოს“ ინიციატივაზე საჭიროა მსჯელობა და კონსულტაციები, რის გამოც საკრებულოს სხდომა 20 იანვრამდე გადაიდო.

საკრებულოს სხდომა გადაიდო ასევე სენაკშიც. მიზეზი ისევ ქვროუმის არ არსებობაა. სენაკში და წალენჯიხაში თავმჯდომარის არჩევა რამდენიმე კვირაა ვერ ხერხდება, რადგან უმრავლესობა არცერთ პოლიტიკურ პარტიას არ აქვს.

imedinews.ge