წალენჯიხის საკრებულოს სხდომა მესამედ ჩაიშალა, დეპუტატებმა საკრებულოს თავმჯდომარე ვერც ამჯერად აირჩიეს.

სხდომის დაწყებამდე პარტია „საქართველოსთვის“ წევრებს საკრებულოს თავმჯდომარის წევრობაზე საკუთარი კანდიდატურა უნდა დაესახელებინათ, რომელსაც ოპოზიციური პარტიები მხარს დაუჭერდნენ, თუმცა „საქართველოსთვის“ დეპუტატებმა საკუთარი გადაწყვეტილება შეცვალეს.

როგორც წალენჯიხის ვიცე-მერმა, „ლელო საქართველოსთვის“ წევრმა თამარ ბელქანიამ „ინტერპრესნიუსთან“ საუბრისას განმარტა, გამომდინარე იქიდან, რომ საკრებულოს უმრავლესობა ოპოზიციის წარმომადგენლებს აქვთ, პოლიტიკური პროცესების წარმართვა არ უნდა გასჭირვებოდათ, თუმცა ცხადია, რომ „ხელისუფლება გახარიას პარტიასთან პოლიტიკურ გარიგებაშია და ურთიერთშეთანხმებულად შლიან ყველა პროცესს“.

„წალენჯიხის მუნიციპალიტეტი არის განსაკუთრებული სივრცე, სადაც არამხოლოდ მერია ოპოზიციური, არამედ საკრებულოს უმრავლესობას წარმოადგენს ოპოზიციური პარტიები. 11 წევრი არის „ნაციონალური მოძრაობიდან“, 11 „ქართული ოცნებიდან“ 1 „ლელოდან“ 3 პარტია „საქართველოსთვის“. რეალურად, ოპოზიციას არ უნდა გასჭირვებოდა პოლიტიკური პროცესების წარმართვა, მაგრამ ხელისუფლება გარიგებულია გახარიას პარტიასთან და ურთიერთშეთანხმებულად შლიან ყველა პროცესს. ბიუჯეტი ყველგან დამტკიცებულია, აქ არ გვაძლევენ შესაძლებლობას, რომ ბიუჯეტის დამტკიცებამდე მივიდეს საქმე. სამჯერ ჩავარდნილი ბიუჯეტის სხდომა ნიშნავს იმას, რომ შეიძლება დადგეს იმპიჩმენტის საკითხიც, მაგრამ აქ ეს ერთხელაც არ ჩატარებულა. ვთავაზობთ ყველა წამყვან პოზიციებს საკრებულოში, გახარიას პარტია ამბობდა, რომ კანდიდატურას დააყენებდა, თუმცა არ დააყენა. გახარიას პარტიის სამი წევრიდან ორს უნდა, რომ იყოს საკრებულოს თავმჯდომარე, არადა ეს სკამი ერთია“, - აღნიშნა თამარ ბელქანიამ.

ipn.ge