ჯანსაღი კვების პროდუქტების ქსელი «ВкусВилл» და საფონდო ბირჟა «СПБ Биржа» ნიუ-იორკის საფონდო ბირჟაზე აქციების განთავსებისთვის ემზადებიან. ეს რუსული კომპანიები, რომლებმაც ბოლო წლებში საერთაშორისო ბირჟებზე გასვლა დააპირეს პირველი არ არის.
მას შემდეგ რაც 2014 წელს დასავლეთმა რუსეთს სანქციები დაუწესა, 2021 წელი ყველაზე აქტიური იქნება, რასაც ბიზნეს-კომპანიების გაყიდვების ზრდა და რუსეთის ეკონომიკის გაცოცხლება ახალისებს.
კიდევ ერთი ფაქტორი, რომელიც რუსულ კომპანიებს საერთაშორისო ბირჟებზე გასვლაში ხელს უწყობს, გეოპოლიტიკური ვითარების გაუმჯობესებაა. მართალია, დღეს ვაშინგტონის და მოსკოვის ურთიერთობები კვლავ ძალიან დაბალ დონეზეა, თუმცა პუტინს და ბაიდენს შორის ივნისში ჩატარებულმა შეხვედრამ ვითარების განმუხტვა მეტნაკლებად მოახერხა.
„ინვესტიციების კუთხით მდგომარეობა დღეს საკმაოდ ხელსაყრელია, შეიმჩნევა სტაბილური ზრდა და ამავე დროს რუსეთს და აშშ-ს შორის დაძაბულობამ მნიშვნელოვნად იკლო“ - განაცხადა ბრიტანული საინვესტიციო ფონდის Aberdeen Standard Investments-ის დირექტორმა ვიქტორ საბომ.
სავარაუდოდ, ამ კუთხით 2021 წელი 2014-ზე წარმატებული იქნება. ამ წელს ლონდონის ბირჟაზე ისეთი რუსული კომპანიები გავიდნენ, როგორიცაა სავაჭრო ქსელი «Фикс Прайс», კერძო კლინიკების ქსელი «Европейский медицинский центр», და ხე-ტყის მოპოვება-გადამუშავების კონცერნი «Сегежа Групп».
რუსეთის უმსხვილესმა ონლაინ-რითეილერმა Ozon Group-მა ნოემბერში ნიუ-იორკის ბირჟაზე 1 მლრდ. დოლარის აქციები გაყიდა.
რუსულ კომპანიებს განვითარებული ქვეყნების ფინანსური ბაზრები ყოველთვის აინტერესებდათ და დღეს მათ ამ ბაზრებზე გასვლის შესაძლებლობა მიეცათ. უკვე წლების მანძილზე ნიუ-იორკის ბირჟაზე წარმატებულად მუშაობს რამდენიმე მსხვილი რუსული კომპანია. ესენია: ინტერნეტ-გიგანტი «Яндекс», დასაქმების ონლაინ-პლატფორმა Headhunter Group PLC, და რუსეთის უმსხვილესი მობილური ოპერატორი «Мобильные ТелеСистемы» (МТС).
ბოლო წლების მანძილზე ევროპამ და ამერიკამ რუსეთის წინააღმდეგ სანქციების რამდენიმე პაკეტი მიიღო, თუმცა ინვესტორთა აზრით, ამ ზომებს შეზღუდული ხასიათი აქვთ. თანაც, ბოლო პერიოდში დაძაბულობის განმუხტვის ნიშნები განსაკუთრებით იმის შემდეგ გაჩნდა, რაც ბაიდენის ადმინისტრაციამ გაზსადენ „ჩრდილოეთ ნაკადი-2“-ს დაბლოკვის მცდელობაზე უარი განაცხადა.
ჩინეთის ბოლო თვეების მაგალითი აჩვენებს, რომ ავტორიტარულ ქვეყნებში ბიზნესის მდგომარეობა ძალიან ცვალებადია და ახალ რეგულაციებს სიტუაციის სწრაფად შეცვლა შეუძლიათ. პეკინი ბოლო თვეებში მსხვილი ჩინური კონცერნების წინააღმდეგ საკმაოდ მკაცრ ზომებს იღებს.
თუმცა, ინვესტორების აზრით, რუსეთი მსხვილ კომპანიებს ჩინეთთან შედარებით ბევრად მეტ თავისუფლებას ანიჭებს.
„ჩვენ ვერ ვხედავთ, და არც ველოდებით მოსკოვის მხრიდან ისეთ მკაცრ ნორმატიულ-სამართლებრივ შეზღუდვებს, როგორებიც ჩინეთმა შემოიღო. მოსკოვისთვის ასეთი მკაცრი მიდგომა დამახასიათებელი საერთოდა არაა“ - თვლის ვიქტორ საბო.
მოამზადა თენგიზ აბლოთიამ
წყარო: wall street journal