Walt Disney-მ თავის 98-წლიან ისტორიაში პირველად დირექტორთა საბჭოს თავმჯდომარედ ქალი აირჩია. BBC-ის ცნობით, სიუზან არნოლდი, რომელიც ბოლო 14 წელი, ანუ 2007 წლიდან Walt Disney-ის დირექტორთა საბჭოს წევრია, თავმჯდომარის პოზიციაზე ბობ აიგერს წლის ბოლოს შეცვლის.
ადრე სიუზან არნოლდი გლობალური საინვესტიციო ფირმა Carlyle-ის აღმასრულებელი დირექტორი იყო, ხოლო ბობ აიგერს მანამდე Walt Disney-ის აღმასრულებელი დირექტორის თანამდებობა ეკავა, რომელიც 15-წლიანი მუშაობის შემდეგ, 2020 წელს დატოვა. ამჯერად ის დირექტორთა საბჭოს თავმჯდომარის პოსტიდან მიმდინარე წლის ბოლოს წავა.
„მე საბჭოს თავმჯდომარის ამ ახალ როლს ვიღებ და მოუთმენლად ველი, რომ Walt Disney-ის აქციონერების გრძელვადიან ინტერესებს გავაგრძელებ. ასევე, მჭიდროდ ვითანამშრომლებ აღმასრულებელ დირექტორ ბობ ჩაპეკთან, რადგან ის კომპანიის კრეატიული ბრწყინვალებისა და ინოვაციის საუკუნოვან მემკვიდრეობას ეყრდნობა,“ - აცხადებს სიუზან არნოლდი, რომელიც, ასევე, ხელმძღვანელის პოზიციაზე ამერიკის რამდენიმე უდიდეს კომპანიაში მუშაობდა.
Carlyle Group-ის აღმასრულებელი მდივნის პოსტი მას ბოლო რვა წლის განმავლობაში ეკავა. ასევე, წამყვან პოზიციებზე მუშაობდა სამომხმარებლო საქონლის გიგანტ Procter and Gamble-ში და სწრაფი კვების ქსელ McDonald's-ში.
არნოლდის დანიშვნა მას შემდეგ ხდება, რაც მსხვილი კომპანიები კორპორატიული მმართველობის ექსპერტებმა, ინვესტორებმა და მარეგულირებლებმა გააკრიტიკეს, რომ აღმასრულებელი მდივნისა და დირექტორთა საბჭოს თავმჯდომარის პოსტები ხშირად ერთსა და იმავე პირს უკავია და ეს ორი ძირითადი პოზიცია უნდა გაიყოს.
ბობ აიგერი კომპანიაში 1996 წლიდან მუშაობდა. აღმასრულებელ დირექტორად მისი ყოფნის დროს Walt Disney-მ რამდენიმე მნიშვნელოვანი შესყიდვა, მათ შორის Pixar-ის, Marvel-ის, Lucasfilm-ისა და 21st Century Fox-ის მოპოვება შეძლო. 2016 წელს კომპანიამ თავისი პირველი თემატური პარკი და კურორტი ჩინეთში გახსნა.
წლის ბოლომდე Walt Disney-დან წასვლას სხვა ხელმძღვანელი პირიც აპირებს. მათ შორის არის სტუდიის ხელმძღვანელი, ალან ჰორნი, Disney-ის ბრენდირებული ტელევიზიის პრეზიდენტი და მთავარი კრეატიული ოფიცერი, გარი მარში და კომპანიის გენერალური მრჩეველი, ალან ბრავერმანი.
bpn.ge