Deutsche Telekom, Orange,Vodafone და წამყვანი ევროპული სატელეკომუნიკაციო 20 კომპანიისგან შემდგარი ჯგუფი შეთანხმდა, სამი თვით შეამცირონ როუმინგის საბითუმო გადასახადი უკრაინელი პარტნიორებისთვის, რომ მილიონობით უკრაინელ ლტოლვილს სახლში დარჩენილ ოჯახებთან ურთიერთობაში დაეხმარონ.

Reuters-ის ცნობით, კომპანიების ეს ნაბიჯი არის ინდუსტრიის უახლესი ინიციატივა, რადგან ბოლო კვირებში სექტორის ათზე მეტი კომპანია უკრაინაში უფასო ზარებს უკვე ახორციელებს. მათ, ასევე, როუმინგის საცალო საფასურიც მოხსნეს.

როუმინგის საბითუმო საფასურს სატელეკომუნიკაციო ოპერატორები, როგორც წესი, ევროკავშირის სხვა ქვეყნის პარტნიორებს უხდიან. ინიციატივას, ასევე, მობილური ვირტუალური ქსელის ოპერატორების ასოციაცია, MVNO Europe და უკრაინის სამივე მობილური ოპერატორი შეუერთდა.

ევროკავშირის პროვაიდერები შეთანხმდნენ, საბითუმო როუმინგული გადასახადები და ტერმინაციის (შეწყვეტის) ტარიფები ხარჯების დონემდე შეამცირონ, რასაც ტელეკომის ოპერატორები თავიანთ ქსელებში გამავალი ზარების შესრულებაზე აკისრებენ, ასევე, შეამცირონ ტერმინაციის ტარიფები უკრაინული ნომრებიდან. შემცირების ზომა კომპანიებსა და მათ ორმხრივ ხელშეკრულებებზე იქნება დამოკიდებული.

ევროკომისიის ვიცე-პრეზიდენტმა, მარგრეტე ვესტაგერმა სხვა კომპანიებსაც ანალოგიური გადაწყვეტილებისკენ მოუწოდა, ხოლო ევროკავშირის დეპუტატი, ანჟელიკა ვინციგი, რომელიც ამ საკითხს ევროპარლამენტში წარმართავდა, სატელეკომუნიკაციო კომპანიების დაპირებას მიესალმა.

ინიცატივას ხელი მოაწერეს შემდეგმა კომპანიებმა: Bouygues, Fastweb, Iliad, KPN, Liberty Global, MasMovil, Polkomtel, Proximus, Telefonica, Telenor, Telia Company, Three Group და TIM.

წყარო: "ბიზნესპრესნიუსი"