ჯო ბაიდენმა და ვლადიმირ პუტინმა 7 დეკემბერს, ბოლოს და ბოლოს, ჩაატარეს ვიდეო-კონფერენცია, რომელსაც მთელი ევროპა მოუთმენლად ელოდა.
შეხვედრის ყურადღების ცენტრში იყო დაძაბულობა უკრაინის და რუსეთის საზღვარზე, რომელიც სწრაფად იზრდება ბოლო კვირების მანძილზე, მას შემდეგ, რაც რუსეთმა იქ თავისი საჯარისო ნაწილების კონცენტრაცია დაიწყო.
ასეთმა ქმედებებმა გამოიწვია შიშები, რომ რუსეთი უკრაინის წინააღმდეგ სამხედრო აგრესიას აუცილებლად წამოიწყებდა.
როგორც ცნობილი გახდა, ლიდერების საუბარი ხუმრობების გაცვლით დაიწყო, თუმცა, სახუმარო პრეზიდენტებს ბევრი არაფერი ჰქონდათ.
კრემლის მეთაურმა თავისი პოზიცია ნათლად ჩამოაყალიბა - რუსეთი ვაშინგტონისგან მოითხოვს გარანტიას, რომ უკრაინას არასდროს მიიღებენ ნატოში და ამას პირველ რიგში ამერიკელები უზრუნველყოფენ.
გარდა ამისა, პუტინს სურს, რომ ამერიკის და ნატოს მხრიდან მოკავშირეების მხარდამჭერი სამხედრო ოპერაციები გარკვეული ხაზის აღმოსავლეთით არ ჩატარდება.
სწორედ ამას ელოდა საერთაშორისო საზოგადოება და მას-მედია.
მაგრამ ბაიდენმა პუტინს აუხსნა, რომ პუტინისგან ვერანაირ წითელ ხაზებს ვერ მიიღებს.
2-საათიან საუბარში რუსეთის პრეზიდენტმა ამერიკელ კოლეგას უთხრა, რომ ნატო თავის სამხედრო პოტენციალს მისი ქვეყნის საზღვრებთან აძლიერებს და მოითხოვა მტკიცე, კანონის სახით ჩამოყალიბებული გარანტია, რომ ნატო არ გაფართოვდება აღმოსავლეთისკენ და არ განათავსებს შეტევით შეიარაღებას რუსეთის მეზობელ-ქვეყნებში, - ნათქვამია კრემლის პრეს-რელიზში.
თავის მხრივ, თეთრი სახლის პრეს-სამსახურმა გაავრცელა განცხადება, რომელშიც ნათქვამია, რომ „ჯო ბაიდენმა გამოხატა აშშ-ის და ევროპელი მოკავშირეების შეშფოთება რუსეთის მიერ უკრაინის ირგვლივ ძალების კონცენტრირების გამო“.
აშშ-ის პრეზიდენტის მრჩეველმა ეროვნული უსაფრთხოების საკითხებში ჯეიკ სალივანმა განაცხადა, რომ ბაიდენს თავის თავზე არ აუღია არანაირი გარანტიები, რომ უკრაინა ნატოში ვერასდროს შევა.
მით უმეტეს, ასეთი გარანტიის მიცემა შეუძლებელია იმ ფონზე, როდესაც უკრაინა ნატოში შესვლას უკვე წლების მანძილზე ცდილობს.
ამერიკის დაზვერვა მიიჩნევს, რომ რუსეთი, შესაძლოა, უკრაინაზე 175 000 ჯარისკაცის გამოყენებით გეგმავს თავდასხმას, რამდენიმე ფრონტიდან, 2022 წლის დასაწყისიდან - ამის თაობაზე ნათქვამია სპეციალურ სადაზვერვო მოხსენებაში, რომელიც თეთრი სახლის დავალებით გაკეთდა.
ორშაბათს ვიქტორია ნულანდი, სახელმწიფო დეპარტამენტში მესამე ადამიანი, კონგრესში მივიდა და ინფორმაცია ბაიდენ-პუტინის დაგეგმილი შეხვედრის შესახებ საერთაშორისო საქმეთა კომიტეტის წევრებს გააცნო.
საუბრის დროს სენატორებმა, როგორც დემოკრატებმა, ასევე რესპუბლიკელებმა, პრეზიდენტის ადმინისტრაციისგან რუსეთის და პუტინის წინააღმდეგ მძლავრი სანქციების პაკეტის მომზადება მოითხოვეს.
სენატორების წინაშე გამოსვლისას, ნულანდმა განაცხადა, რომ გერმანიის მთავრობამ კრემლს უკვე შეატყობინა - თუ რუსეთი უკრაინაში შეიჭრება, ბერლინი „ჩრდილოეთის ნაკადი-2“-ზე უარს იტყვის.
ნულანმდა ასევე განაცხადა, რომ განიხილება მსოფლიო საგადახდო სისტემისგან რუსეთის სრული იზოლაცია იმ შემთხვევაში, თუ ის მართლაც დაიწყებს ომს უკრაინის წინააღმდეგ.
„ამას ძალიან სერიოზული ნეგატიური შედეგები ექნება რუსული ბიზნესისთვის და რუსი ხალხისთვის, რომელსაც კარგი სამუშაოს მოპოვების, ვაჭრობის და მოგზაურობების შესაძლებლობები მკვეთრად შეუმცირდება“, - განაცხადა მან.
Washington post