შპს „საქართველოს მელიორაციის“ გენერალურმა დირექტორმა, თენგიზ ნასარიძემ   საქართველოს პარლამენტის აგრარულ საკითხთა   კომიტეტის   სხდომაზე    კომპანიის 2022 საქმიანობის ანგარიში  და 2023 წლის სამოქმედო გეგმა წარადგინა. კომპანიის დირექტორმა უკვე განხორციელებულ და დაგეგმილ სამელიორაციო ინფრასტრუქტურულ ღონისძიებებზე, აგრარული დარგის განვითარების ხელშეწყობისთვის აღნიშნული ღონისძიებების მნიშვნელობაზე ისაუბრა და ყურადღება  არსებულ გამოწვევებზე გაამახვილა. თენგიზ ნასარიძემ წყალუზრუნველყოფილი და დრენირებული ფართობების დინამიკას გაუსვა ხაზი და აღნიშნა, რომ  მიღებული შედეგები ხელშესახები და შთამბეჭდავია.

აღსანიშნავია, რომ, ბოლო 10 წლის განმავლობაში, წყალუზრუნვეყოფილი ფართობი 45 000 ჰექტარიდან 164 000 ჰექტარამდე, ხოლო დრენირებული მიწის ფართობი 14 000-დან 44 000 ჰექტარამდეა გაზრდილი.  

კომპანია 2023 წელსაც აქტიურად აგრძელებს სამელიორაციო ინფასტრუქტურულ სამუშაოებს. დღეის მდგომარეობით, ქვეყნის მასშტაბით, 61,5 მლნ ლარის ღირებულების    სარეაბილიტაციო პროექტები მიმდინარეობს. კომპანიის მშენებლობა-რეაბილიტაციის სამოქმედო   გეგმით,  წელსვე  დაგეგმილია 52 პროექტის დაწყება,  ჯამური ღირებულებით 100,9 მლნ ლარი. მიმდინარე და დაგეგმილი პროექტების სრულად განხორციელების შედეგად,  რეგულარულად, დამატებით, 14 570 სასოფლო-სამეურნეო მიწის ფართობი მოირწყვება,  წყლის მიწოდება 22 865 ჰექტარზე გაუმჯობესდება, ხოლო დრენირებული მიწის ფართობი 905 ჰექტარით გაიზრდება.

ინფორმაციას შპს „საქართველოს მელიორაცია“ ავრცელებს