რაჭაში  რთველი 2022 აქტიურ  ფაზაშია, ყურძნის კრეფა -  დაბინავება დაიწყო, როგორ მიმდინარეობს  რთველი და  რამდენი  ტონა ყურძენია დღეის მდგომარეობით ჩაბარებული ამის შესახებ, რადიო „კომერსანტის“ გადაცემაში, „კომერსანტის დილა“ ღვინის ეროვნული სააგენტოს თავმჯდომარემ ლევან მეხუზლამ ისაუბრა.

მისი თქმით, წლევანდელი  გვალვების  გამო, შარშანდელთან  შედარებით ყურძნის მოსავალი შემცირებულია და სავარაუდოდ მოსავალი 1500 ტონას არ ასცდება.

„რაჭაში რთველი მიმდინარეობს და რამდენიმე დღეა რაც ყურძნის კრეფა დაიწყო, ამ  ეტაპისთვის 470 ტონა ალექსანდროულ და მუჯურეთულია ჩაბარებული, სწორედ მათგან მზადდება ღვინო ხვანჭკარა, მიუხედავად იმისა, რომ რაჭაში კახეთის მსგავსად ვაზი საკმაოდ დატვირთულია, წელს ძლიერმა გვალვებმა ვაზს თავისი შედეგი დაატყო და ვფიქრობთ, რომ ჯამური მოსავალი 1500 ტონას არ ასცდება, შარშან მისი რაოდენობა 1700 ტონა იყო, ასევე აღსანიშნავია, ისიც რომ სუბსიდირების თემამ გაამართლა“, -  აღნიშნა ლევან მეხუზლამ.

რაც შეეხება რაჭაში სუბსიდირებას, მეხუზლას თმით წინა წელთან შედარებით სახელმწიფომ სუბსიდირებაზე  ერთი ლარი მოუმატა იმ კომპანიებს, რომლებიც არანაკლებ 7 ლარს გადაიხდიან ალექსანდროულისადა მუჯურეთული ყურძნის ჯიშებში.

„რაჭაში რთველში მონაწილეობასა და ხვანჭკარის დამზადების სურვილი 30- მდე კომპანიამ გამოთქვა თუმცა ამას ემატება პატარა და მცირე მარნები და ვფიქრობ ჯამში მეტი კომპანია იქნება.

შარშანდლისგან განსხვავებით სუბსიდირება  ერთი ლარით გაიზარდა იმ კომპანიებისთვის, რომლებიც ალექსანდროულსა და მუჯურეთულ ყურძნის ჯიშებს არანაკლებ 7 ლარად ჩაიბარებენ და სუბსიდიის  სახით 4 ლარი აუნაზღაურდებათ“, -  აღნიშნა ლევან მეხუზლამ.

თაკო კვაჭანტირაძე