„წინა წელთან შედარებით პრემიუმ კლასის ავტომობილების გაყიდვა 44% - ით გაიზარდა,“ - ამის შესახებ „კომერსანტს“ GT motors- ში უთხრეს.
„2022 წლის 10 თვის მონაცემებით პრემიუმ კლასის ავტომობილების გაყიდვა 2021 წლის მთლიან წელთან შედარებით 44%-ით არის გაზრდილი. მოთხოვნა მკვეთრად გაზრდილია, განსაკუთრებით პრემიუმ ბრენდებზე და ჩვენ აქტიურად ვმუშაობთ ყველა ჩვენს ავტომწარმოებელთან, რათა მომხმარებელს სასურველი მოდელი დროულად მივაწოდოთ“- აცხადებენ GT motors - ში
1-ელი სექტემბრიდან GT motors მსოფლიოში წამყვანი საავტომობილო ბრენდებს, BMW-სა და MINI-ს საქართველოში ოფიციალურად წარმოადგენს, როგორც კომპანიაში აღნიშნავენ BMW და MINI საქართველოში ერთ-ერთი ყველაზე მოთხოვნადი ბრენდებია.
„მას შემდეგ რაც ამ ბრენდების ოფიციალური წარმომადგენლები გავხდით, გაზრდილი მოთხოვნა განსაკუთრებით ვიგრძენით. პირველ ეტაპზე მივიღეთ BMW-ს ექსკლუზიური მოდელი, M5 CS, რომელიც ბრენდმა ლიმიტირებული რაოდენობით აწარმოა და მსოფლიოში მხოლოდ 1000 ერთეული არსებობს, ჩვენ კი ქართველი მომხმარებლისთვის 9 ერთეულის ჩამოყვანა შევძელით , რაც ჩვენი რეგიონისთვის საოცარი მაჩვენებელია. ამ მოდელის უნიკალურობიდან გამომდინარე მოთხოვნა ძალიან მაღალი იყო და უკვე ყველა მათგანი გაყიდულია“, - აცხადებენ GT motors - ში.
BMW-სა და Mini-ს დროებითი შოურუმი 2023 წლის პირველ კვარტალში გაიხსნება, რომელიც დ. აღმაშენებლის ხეივანზე N216 -ში GT Group-ის შენობაში იქნება განთავსებული. მათვე ცნობით პარალელურად გერმანელი არქიტექტორები ახალი შოურუმის პროექტზე უკვე მუშაობენ, შოუ რუმი სავარაუდოდ 2024 წელს გაიხსნება.
კომპანიაში ამბობენ. რომ აღნიშნული მოდელების მომხმარებლები ძირითადად ქართველები არიან. თუმცა, კომპანიის მიერ საქართველოში წარმოდგენილი ბრენდებით უცხო ქვეყნის მოქალაქეებიც ინტერესდებიან.
თაკო კვაჭანტირაძე