საკონდიტრო კომპანიებმა აღდგომის დღესასწაულისთვის სამზადისი დაიწყეს. საკონდიტროებში აცხადებენ, რომ შარშანდელთან შედარებით წარმოების ზრდა მოახერხეს და პირველი შეკვეთებიც მიიღეს. ცხადია, ნედლეულის გაძვირება პროდუქტის ფასზეც აისახა. კომპანიების წარმომადგენლების ინფორმაციით, პასკა დაახლოებით 10-20%-ის ფარგლებში გაძვირდა. საფასო ცვლილება პასკის უკლებლივ ყველა დასახელების ნედლეულს შეეხო და ზოგი პროდუქტი 3-ჯერ ძვირია, ვიდრე გასულ სეზონზე ღირდა.
მიიღე ინფორმაცია უფრო სწრაფად „კომერსანტის“ Telegram-ზე.
საკონდიტრო ,,ტარტანის“ მენეჯერის ჯული ჭაჭიაშვილის თქმით, აღდგომის ბრწყინვალე დღესასწაულისთვის მზადება დაიწყეს და კომპანიის ყველაზე გემრიელი შეთავაზება საკუთარი წარმოების პასკებია, რომელიც ტრადიციული რეცეპტით და ნატურალური, უმაღლესი ხარისხის ინგრედიენტებით მზადდება.
,,სეზონი საკმაოდ აქტიურად დავიწყეთ, თუმცა ფასების შენარჩუნება რეალურად ვერ მოხერხდა. მაღალი ფასი დღესდღეობით გლობალური პრობლემაა, რაც ყველა ქვეყანას შეეხო. ჩვენს შემთხვევაში, ნედლეული 60-70%-ით, ზოგ შემთხვევაში, 100%-ითაც არის გაძვირებული. ასეთ ფონზე მაქსიმალურად ვეცადეთ, რომ მასშტაბური ცვლილება არ მოგვეხდინა, 5 ლარით ანუ 17%-ით გავზარდეთ ფასი. პასკა იყიდება სტანდარტულად 1 კილოგრამიანი შეფუთვით და 35 ლარი ღირს. რაც მთავარია, ეს არის 100%-ით ნატურალური, უვნებელი და გემრიელი პროდუქტი. გარანტირებული შეკვეთები გვაქვს, რასაც განაპირობებს ნდობა მომხმარებლის მხრიდან. ძვირადღირებულ ნედლეულს ვიყენებთ. ტოტალური სიძვირის მიუხედავად, არ ჩაგვინაცვლებია სხვა პროდუქტით, რითაც ხარისხი და სტანდარტი სრულად შევინარჩუნეთ“, - ამბობს ,,კომერსანტთან“ ჯული ჭაჭიაშვილი.
დაახლოებით 10-12%-ით გაძვირდა ,,სანდომის“ პასკა, ხოლო წარმოება შარშანდელთან შედარებით, 1,5-ჯერ გაზარდეს.
კომპანიის გაყიდვების მენეჯერის საბა მამალაძის თქმით, მომხმარებელს ,,სანდომის“ პასკების შეძენა ქვეყნის მასშტაბით არსებულ თითქმის ყველა მსხვილ სავაჭრო ქსელში შეუძლია.
,,ყოველწლიურად საკმაოდ დიდი რაოდენობით პასკა ცხვება ჩვენს საწარმოში და რეალიზაციაც სრულიად საქართველოს მასშტაბით ხორციელდება. წელს ცვლილება ძირითადად ფასებს უკავშირდება. ნედლეულის გაძვირებიდან გამომდინარე, პასკის ფასი 10-12%-ით არის გაზრდილი. გასულ წელთან შედარებით, ფქვილის, ცხიმისა და შაქრის ფასმა ფაქტობრივად რეკორდი მოხსნა. ასეთ ფონზე მაქსიმალურად შევეცადეთ სხვაობა მეტნაკლებად მისაღები იყოს ქართველი მომხმარებლისთვის და ხელმისაწვდომობა არ შეიზღუდოს. წარმოებაც დაახლოებით 1,5-ჯერ გავზარდეთ, აქტიურ გაყიდვებს ველოდებით“, - ამბობს საბა მამალაძე ,,კომერსანტთან“.
წლევანდელი სააღდგომო სეზონი საკმაოდ დატვირთული აღმოჩნდა ,,იფქლისთვის“. როგორც კომპანიის გენერალური დირექტორი ბაქარ ბაკურაძე აღნიშნავს, ფასები უმნიშვნელოდ შეიცვალა და მაქსიმუმი გაკეთდა, რომ ,,იფქლის” ნაწარმი მომხმარებლისთვის ხელმისაწვდომი იყოს.
,,ჩვენი პასკები უკვე ჩაეშვა გაყიდვაში. შევეცადეთ მაქსიმალურად დაბალი ფასი შეგვენარჩუნებინა, პროდუქტი მხოლოდ 50 თეთრით გავაძვირეთ. ეს არის რამდენიმე ზომის პასკა, რომლის ფასიც 2,50 ლარიდან იწყება და 10 ლარს აღწევს. პროდუქტი იყიდება როგორც ჩვენს მაღაზიებში, ასევე ქსელური მარკეტების საკმაოდ დიდ ნაწილში. როგორც წესი, პასკას ვაწარმოებთ წელიწადში ერთხელ, ამიტომ პრიორიტეტად დავისახეთ, რომ მოსახლეობისთვის ეს ხარჯი მაინც შეგვემსუბუქებინა“, - ამბობს ბაქარ ბაკურაძე ,,კომერსანტთან“.
საქართველოში მართლმადიდებელი მრევლი აღდგომის ბრწყინვალე დღესასწაულს 24 აპრილს აღნიშნავს.
მარი ჩიტაია