წისქვილკომბინატები ფქვილის იმპორტზე „სარკისებური“ საბაჟო გადასახადის დაწესებას ითხოვენ. მწარმოებლები ამბობენ, რომ სხვა შემთხვევაში ქვეყანაში არა თუ მცირე, არამედ მსხვილი წისქვილებიხ დაიხურება.
წისქვილკომბინატი ,,აგროექსპორტის“ გენერალური დირექტორი დავით დოლაბაძე ამბობს, რომ ორი წისქვილიდან ერთი კომპანიამ უკვე გააჩერა, მეორეში კი, თანამშრომლები შეამცირა.
,,ჩვენი პრობლემა არის რუსული ხორბლის ტარიფები და მცურავი ბაჟი, რაც საკმაოდ აქტუალურია უკანასკნელი 6 თვის განმავლობაში. ჩვენ არაერთი შეხვედრა გვქონდა სამუშაო ჯგუფთან, რათა დაიძლიოს არაკონკურენტული გარემო ადგილობრივი წარმოებისათვის, რომელიც იწვევს, წისქვილკომბინატების ერთმანეთის მიყოლებით დახურვას და ქართული ფქვილის რუსულით ჩანაცვლებას.
ჩვენ გვაქვს 2 წისქვილი, საიდანაც გორის კომბინატში მუშაობა გავაჩერეთ, თბილისში კი შევამცირეთ კადრები. ასეა ძალიან ბევრი წისქვილი და დარგიც გაქრობის წინაშეა. ვითხოვთ, გადაიხედოს არსებული საგადასახადო მიდგომები და დაწესდეს სარკისებური ბაჟი, იმპორტირებულ ფქვილზე ისე როგორც ეს ხდება ხორბალზე და დღეს 98 დოლარს შეადგენს“ - განაცხადა დოლაბაძემ.
ხორბლისა და ფქვილის მწარმოებელთა ასოციაციის ხელმძღვანელის ლევან სილაგავა თქმით კი, ხორბლის ფქვილის იმპორტით ჩანაცვლებამ გასულ წელს ათამდე წისქვილკომბინატის მუშაობის შეჩერება უკვე გამოიწვია. მიმდინარე წელს კი მცირე და საშუალო წისქვილების შემდეგ, ტენდენცია დიდ კომბინატებსაც შეეხოთ.
„ჩვენ, ვითხოვთ შეხვედრას პრემიერთან და ეკონომიკური გუნდის მინისტრებთან ერთობლივ ფორმატში. გამომდინარე იქიდან, რომ რამდენიმე თვის წინ დამდგარი პრობლემა სულ უფრო ღრმავდება და დღეს, ჩვენ მივედით იმ მდგომარეობამდე, როცა მცირე და საშუალო კომბინატების გარდა იხურება დიდი წისქვილკომბინატებიც. გასულ წელს, დაიხურა 10 წისქვილი, წელს კი, როგორც აღვნიშნე ეს ტენდენცია დიდ წისქვილებზეც გადავიდა. ეს ძალიან დიდი პრობლემაა.
შეგახსენებთ, პრობლემის არსი, რუსეთის მიერ ხორბალზე დაწესებული მცურავი ბაჟია, რაც ფქვილზე არ არსებობს, შესაბამისად, აზრი დაკარგა ქვეყანაში ხორბლის იმპორტმა. ფქვილის აგრესიული იმპორტია დაწყებული, თუ იმ პერიოდში, როცა ნულოვანი გადასახადი მოქმდებდა ორივე პროდუქციაზე, ბალანსი იყო ამგვარი - 1 000 ტონა ფქვილი შემოდიოდა და 60 000 ტონა ხორბალი თვეში. დღეს, ეს ბალანსი მკვეთრად შეცვლილია და მივედით იქამდე რომ დეკემბერში 7 000 ტონამდე ფქვილი და 6 000 ტონა ხორბალი შემოვიდა. ამან გამოიწვია ის, რომ წისქვილკომბინატებმა დაიწყეს დახურვა, ზოგმა კი ხორბლის იმპორტი ფქვილით ჩაანაცვლა.
პურის ფასთან მიმართებით, მინდა ვთქვა, რომ არასწორია მსჯელობა თითქოს ფქვილის გაზრდილი იმპორტია პურის ფასის შენარჩუნების რეცეპტი, მაშინ, როცა ამ პირობებში უკვე ორჯერ გაიზარდა ფასი პურზე“, - განაცხადა სილაგავამ.
BPN.GE