პროფესიული უნარების სააგენტოს კვლევისა და ინკლუზიური განვითარების გუნდის ლიდერმა გელა ლომიაშვილმა სააგენტოს საქმიანობის შესახებ კომერსანტის ეთერში, ნინო ლიპარტიას გადაცემაში „ბიზნესი და სამართალი“ ისაუბრა.
გელა ლომიაშვილის თქმით, არსებული ვითარების შესწავლის შედეგად ნათელი გახდა რომ პროფესიულ განათლებას განსხვავებული მართვის სტილი სჭირდებოდა და სააგენტოს ჩამოყალიბების საფუძველიც სწორედ ეს გახდა.
გელა ლომიაშვილის თქმით, პროფესიული განათლების განვითარებისთვის უმნიშვნელოვანესია კერძო სექტორთან კავშირი. ამაში იგულისხმება არა მხოლოდ თანამშრომლობა, არამედ ის, რომ კერძო სექტორი იყოს ჩართული პროფესიული განათლების მართვის პროცესშიც.
„პროფესიული უნარების სააგენტო განსხვავებული სააგენტოა, დაარსებულია განათლებისა და მეცნიერების სამინისტროსა და სამრეწველო პალატის ერთობლივი თანამშრომლობით, მას მართავს ბორდი, რომლის 6 წევრი არის დარგობრივი სამინისტროების მინისტრის მოადგილეები დანარჩენი 6 წევრი კი ძირითადი დარგობრივი ასოციაციებიდან. პროფესიული უნარების სააგენტოს მიზანია, რომ ერთის მხრივ კერძო სექტორის ჩართულობა კიდევ უფრო გააქტიუროს და მეორეს მხრივ შეუწყოს ხელი პროფესიულ დაწესებულებების დეცენტრალიზაციასა და გაძლიერებას,“- განაცხადა გელა ლომიაშვილმა.
გელა ლომიაშვილის თქმით, იმ ფონზე როდესაც კერძო სექტორი კადრების დეფიციტს უჩივის, უმნიშვნელოვანესია პროფესიული განათლების დაწესებულებებთან მჭიდრო თანამშრომლობა.
„როცა კერძო სექტორი საუბრობს იმაზე, რომ კადრების დეფიციტია, ჩვენი საგანმანათლებლო პროგრამები საკმარისად არაა აღჭურვილი მათთვის საჭირო უნარებით, ამის გადაჭრის ერთადერთი გზა არის, რომ კერძო სექტორი იყოს ჩართული როგორც პროგრამების შემუშავების, ასევე მომზადების პროცესშიც.
ჩვენ წლიდან წლამდე ვზრდით დუალურ პროგრამებს. თითქმის ყველა დარგში გვაქვს. ბევრი კომპანიაა, რომლებიც აქტიურად თანამშრომლობენ. ხარჯავენ რესურსს და ურჩევნიათ, რომ ეს სტუდენტები სწორედ მათ კომპანიებში დარჩნენ, სტატისტიკას თუ გადავხედავთ, დუალური პროგრამების სტუდენტების დიდი ნაწილი, სწორედ ამ კომპანიებში საქმდება,“ - განაცხადა გელა ლომიაშვილმა.
როგორც გელა ლომიაშვილი ამბობს, სააგენტოს საქმიანობის უმნიშვნელოვანესი კომპონენტია კვლევები, რომელიც იმ მდგომარეობას და საჭიროებებს იკვლევს, რომელიც პროფესიულ განათლებასთან დაკავშირებით ქვეყანაში არსებობს.
„კვლევას ვატარეთ გარკვეული ინტენსივობით, ჩავატარეთ კვლევა თუ რა აზრისაა საზოგადოება პროფესიულ განათლებაზე, მიღებული შედეგებით, არ ვიტყვი, რომ ჩვენ უნდა მოვეშვათ და ბედნიერები ვიყოთ, მაგრამ ვიტყვი იმას, რომ წლების განმავლობაში პროფესიული განათლების პრესტიჟი იზრდება,“ - განაცხადა გელა ლომიაშვილმა.
სააგენტოს საქმიანობაზე საუბრისას გელა ლომიაშვილმა ასე ხაზი გაუსვა იმ სამუშაოს, რომელიც განათლების მეტი ინკლუზიურობის მიღწევისთვის ხორციელდება.
პროფესიული უნარების სააგენტო
