პაკისტანის ოფიციალურმა პირებმა შეშფოთება გამოხატეს წყლით გავრცელებული დაავადებების და საკვების ნაკლებობის საფრთხის შესახებ, იმ ფონზე, როცა 31 აგვისტოს ბევრ ადგილას უკან დახევა დაიწყო წყალდიდობისას მოვარდნილმა წყალმა - რომელმაც, გავრცელებული ცნობებით, მანამდე ქვეყნის მესამედი მოიცვა.
ძლიერი წვიმით გამოწვეულმა დატბორვამ ივნისის შუა რიცხვების შემდეგ იმსხვერპლა 1100-ზე მეტი ადამიანი, გაანადგურა ან დააზიანა მილიონამდე სახლი და შედეგები გამოიწვია ათობით მილიონი პაკისტანელისთვის. გაერო გამოვიდა ოფიციალური თხოვნით პაკისტანისთვის სასწრაფო დახმარების სახით შეგროვდეს 160 მილიონი დოლარი. ქვეყნის კატასტროფათა ცენტრი აცხადებს, რომ 220 მილიონი ადამიანის მოსახლეობის მქონე ქვეყანაში თითქმის ნახევარ მილიონ პირს სახლ-კარის დატოვება მოუხდა და ამჟამად ბანაკებს აფარებს თავს.
ჯანდაცვის მსოფლიო ორგანიზაციის (WHO) წარმომადგენელი პაკისტანში ამბობს, რომ ყველაზე მეტად დაზიანებულ ადგილებში პრიორიტეტს წარმოადგენს სასწრაფო ჯანდაცვასთან წვდომა და დაავადებებზე დაკვირვების გაძლიერება, რათა არ გაჩნდეს დაავადებათა აფეთქების კერები.
პრემიერ-მინისტრმა, შეჰბაზ შარიფმა წყალდიდობას უწოდა ყველაზე მძიმე პაკისტანის ისტორიაში. მან 31 აგვისტოს თქვა, რომ განადგურებულია ბრინჯის, ხილის და ბოსტნეულის მოსავალი, და წყალმა წაიღო 700,000-მდე პირუტყვი.