ირანის ნავთობით მდიდარ ხუზესტანის პროვინციაში მეხუთე დღეა გრძელდება საპროტესტო გამოსვლები წყლის მწვავე უკმარისობის გამო.
სოციალურ ქსელებში 19 ივლისს გავრცელებულ ვიდეოკადრებზე ჩანს, თუ როგორ სკანდირებენ დემონსტრანტები, რომლებსაც ბლოკირებული აქვთ გზები, ხოლო სამართალდამცველები ცრემლსადენი გაზით შლიან შეკრებილ ადამიანებს. ცალკეულ ვიდეოკადრებზე ასევე ისმის სროლის მსგავსი ხმები.
საპროტესტო გამოსვლებს ადგილი ჰქონდა ირანის სამხრეთ-დასავლეთ პროვინციაში მდებარე ქალაქებში აჰვაზში, სუსენგერდისა და რამგორმოზში.
წყლის უკმარისობით გამოწვეულმა საპროტესტო გამოსვლებმა ირანში 15 ივლისს იფეთქა. გადაუმოწმებელი ინფორმაციით, ამ პერიოდში ირანში სამართალდამცველებითა შეტაკებაში სულ მცირე 4 ადამიანი დაიღუპა. ადგილობრივი ხელისუფლება ძალადობის პროვოცირებაში „ამბოხებულებს“ აკისრებს პასუხისმგებლობას.
ირანი ბოლო 50 წლის მანძილზე ყველაზე დიდი გვალვების წინაშე აღმოჩნდა, რასაც კიდევ უფრო ართულებს წყლის რესურსების გამოყენების მოუქნელი სისტემა.
გვალვამ დიდი ზარალი მიაყენა ირანის სოფლის მეურნეობას და უკიდურესად შეამცირა რეზერვები წყალსაცავებში.
"რადიო თავისუფლება"