უკვე სამი დღეა, რაც დედაქალაქში ელექტრო სკუტერების გაზიარების სისტემა გამოჩნდა. რასაც სოციალურ მედიაში დიდი გამოხმაურება ამ სერვისის ფასის გამო მოჰყვა. მომხმარებლების დიდი ნაწილი მიიჩნევს, რომ ერთი წუთი 35 თეთრი სკუტერისთვის, რაც საათში მინიმუმ 21 ლარია, ადგილობრივებისთვის შეუფერებელი ფასია.

პროექტი თბილისის მერიის მხარდაჭერით კომპანია „სქროლმა“ ამერიკულ Bird-თან თანამშრომლობით შეიმუშავა. მიუხედავად ფასთან დაკავშირებული აჟიოტაჟისა, კომპანიაში აცხადებენ, რომ მომხმარებლების აქტიურობამ მათ მოლოდინს გადააჭარბა. როგორც „სქროლის“ წარმომადგენელი დანიელ დოინიცინი „კომერსანტთან“ განმარტავს, ფასი საერთაშორისო სტანდარტის შესაბამისია და დარწმუნებულია, რომ ამ სერვისით სკუტერები ქალაქში მანქანების რაოდენობის შემცირებასა და ეკოლოგიურად სუფთა გარემოს შექმნას შეუწყობს  ხელს.

„უკვე ძალიან ბევრი ადამიანი იყენებს „სქროლს“. ხალხის მიერ ინოვაციების სიყვარულმა ჩვენს მოლოდინებს გადააჭარბა.გვიხარია და მადლობელი ვარ ყველა ჩვენი მომხმარებლის. ფასი საერთაშორისო სტანდარტის მიხედვით დადგინდა და ამით უკმაყოფილო საზოგადოების სულ მცირე, დაახლოებით 1%-ია.სოციალურ ქსელში კი სხვა აჟიოტაჟი ატყდა და მესმის ეს განწყობები. ჩვენ დიდი ხანია ქართულ ბაზარს ვსწავლობთ და გვგონია, რომ მანქანების შემცირებას ნამდვილად შევძლებთ ამ ქალაქში, რაც ნაკლებ დაბინძურებას ნიშნავს.ასევე „სქროლს“ აქვს მესამე პირის დაზღვევა. მაგალითად, თუ მომხმარებელი „სქროლვისას“ ვინმეს ეჯახება ან მანქანას დააზიანებს, ის მესამე პირი ჩვენგან დაზღვეულია“ - აღნიშნავს დანიელ დოინიცინი,  კომპანია „სქროლის“ ბიზნესგანვითარების მიმართულების ხელმძღვანელი.

კორონავირუსის პანდემიისა და გადაადგილების შეზღუდვის გამო ზოგ ქვეყნებში მოსახლეობა გადაადგილების ალტერნატიულ გზებს ეძებს. ამერიკის ზოგიერთ შტატსა და ევროპის რიგ ქალაქებში სკუტერებით გადაადგილება უსაფრთხოების კუთხით აკრძალულია. თუმცა, კომპანიები Lime , Bird, Wind, LYNX-ი ოპერირებას ჩვეულ რეჟიმში აგრძელებენ, იქ სადაც საკარანტინო ზომები შედარებით შემსუბუქებულია.

ელექტრო სკუტერების ერთი წუთით დაქირავება პარიზში 0,15 ევრო ღირს,  ერთი საათი კი 10 ევრო ჯდება.განსხვავებული მდგომარეობაა ბარსელონაში, სადაც მთელი დღით კომპანია LYNX-ი  სკუტერებს 20 ევროდ აქირავებს.

მარიამ მორგოშია