თიბისი ბანკის ბრიტანელი აქციონერის იან მალქოლმ ჰოქის ქართველმა ადვოკატმა დიმიტრი ტორაძემ პრეს–კონფერენციაზე განაცხადა, რომ მამუკა ხაზარაძისა და ბადრი ძაფარიძის მიერ ბანკიდან $16 მლნ–ის არამართლზომიერად მითვისების გამო, ამ თანხაზე მიუღებელი შემოსავლიანად აქციონერებმა $40 მლნ იზარალეს.

„აქციების შეძენით ჩემმა მარწმუნებელმა და მისმა მეგობრებმა თავისი დანაზოგი ანდეს თიბისი ბანკს და იმედოვნებენ, რომ არ შემცდარან არჩევანში. მას იმედი აქვს, რომ ბანკის დღევანდელი ხელმძღვანელობა ყველაფერს გააკეთებს, რათა უზრუნველყოს აქციონერ  მამუკა ხაზარაძისა და  აქციონერ ბადრი ჯაფარიძის მიერ ბანკიდან უკანონოდ წაღებული ფულის  უკან დაბრუნება და მათი არალეგალური სქემებიდან  ბანკისთვის და მისი აქციონერებისთვის მიყენებული ზარალის  სრულად ანაზღაურება“, – განაცხადა ადვოკატმა დიმიტრი ტორაძემ.

ადვოკატმა იმედი გამოთქვა, რომ თიბისი ბანკის ახლანდელი ხელმძღვანელობა ოპერატიულად გამოეხმაურება მის მიმართვას, დაიცავს ბანკისა და მისი აქციონერების შელახულ ინტერესებს და აანაზღაურებინებს მამუკა ხაზარაძესა და ბადრი ჯაფარიძეს თიბისი ბანკისთვის მიყენებულ 40 მილიონი დოლარის ზარალს, რაც საუკეთესო პირობა იქნება მომავალში ასეთი პრეცედენტების გამოსარიცხად.

„მინდა დაგარწმუნოთ, რომ იან მალკჰოლმ ჰოქი არის ბრიტანეთის გაერთიანებული სამეფოს მოქალაქე, წარმატებული ადამიანი მრავალმხრივი ინტერესებით, სს „თიბისი ბანკის“ აქციები არ არის ერთადერთი ფასიანი ქაღალდი, რომელიც გააჩნია ჩემს მარწმუნებელს. ფასიანი ქაღალდების ფლობის, გამოყენების და ოპერირების კულტურა სამწუხაროდ ევროპაში, განსაკუტრებით კი ბრიტანეთში, ბევრად მაღალია, ვიდრე საქართველოში. ევროპაში საუკუნეების განმავლობაში გამომუშავებული კულტურის მიხედვით, კონტექსტურად სწორად აქცევენ ყურადღებას იმ ფაქტობრივ მოვლენებს, რომლებმაც შეიძლება ნებისმიერი ფორმით (დადებითად და მით უმეტეს უარყოფითად)“, – აღნიშნა დიმიტრი ტორაძემ.

მანამდე ბადრი ჯაფარიძემ განაცხადა, რომ ეძებს ასეთ აქციონერს და დაარწმუნებენ მას, რომ მომხარში საგანგაშო არაფერია, რაზეც ბრიტანელი აქციონერის ადვოკატმა განაცხადა, რომ ამის შესახებ იან მალკჰოლმ ჰოქი საქმის კურსში ჩააყენა.

„მან კმაყოფილებით მიიღო ეს ინფორმაცია, ჩათვალა რომ ეს არის დადებითი ინფორმაცია, თუმცა მეორეს მხრივ დარჩა გაკვირვებული, რატომ ეძებს მას მეინ პარტნიორი, ასევე აქციათა მფლობელი, რომელიც იმავდროულად საჯარო პირია, არის საქართველოს პარლამენტარი და საერთოდ მის განცხადებაზე კომენტარს რატომ აკეთებს პოლიტიკოსი“, – აღნიშნა ტორაძემ. 

ხაზარაძე–ჯაფარიძის საქმის მასალების თანახმად, 2008 წლის აპრილსა და მაისში, ავთანდილ წერეთლის მიერ დაფუძნებულმა შპს „სამგორი თრეიდმა" და შპს „სამგორი M"-მა, თითქოსდა კომპანიების საბრუნავი სახსრების შევსების მიზნით, „თიბისი ბანკისგან" სესხის სახით მიიღეს 16 664 000 აშშ დოლარი.

იმავე დღეს აღნიშნული თანხა სრულად გადაირიცხა მამუკა ხაზარაძისა და ბადრი ჯაფარიძის პირად საბანკო ანგარიშებზე, მიუხედავად იმისა, რომ სესხი თითქოსდა ბიზნესის ბრუნვისთვის იყო მოთხოვნილი.

2008 წლის ოქტომბერ-ნოემბერში კომპანიებს „სამგორი M"-სა და „სამგორი თრეიდს" სესხის გადახდის ვადა გაეზარდათ ერთი წლით ისე, რომ სესხის დაფარვაც კი არ იყო დაწყებული. ხოლო 2008 წლის 31 დეკემბერს სესხის გადახდის ვალდებულების დადგომამდე, „თიბისი ბანკმა" სესხს მიანიჭა უიმედო კრედიტის კლასიფიკაცია, შემდეგ კი უსაფუძვლოდ ჩამოწერა იგი და გადაიტანა შიდა ბალანსზე.

მილიონების დაბრუნება საკუთარ თავზე აიღო კომპანიამ, რომელიც ერთი თვით ადრე დარეგისტრირდა ოფშორულ ზონაში და რომელსაც არანაირი ფინანსური აქტივი არ გააჩნდა საქართველოში. ამ კომპანიამ მიიღო უფლება, მოეთხოვა ფული ხაზარაძისა და ჯაფარიძისგან.

კომპანიებს „სამგორი M"-სა და „სამგორი თრეიდს“ კრედიტი ამ დრომდე არ დაუბრუნებიათ.

(R)