რადიო „კომერსანტის“ ეთერში გადაცემაში „ბიზნესი და სამართალი“ თბილისის სააპელაციო სასამართლოს სისხლის სამართლის მოსამართლე ნათია ბარბაქაძემ ქალთა მიმართ ძალადობაზე საუბრისას აღნიშნა, რომ სტატისტიკის მაჩვენებლის მიხედვით ძალადობის მსხვერპლი ქალების მომართვიანობა მზარდია.

ნათია ბარბაქაძის თქმით, კანონი ძალადობის რამდენიმე ფორმას განსაზღვრავს. ესენია: ფიზიკური, ფსიქოლოგიური, ეკონომიკური, სექსუალური ძალადობა და უგულებელყოფა.

„როცა ფიზიკურ ძალადობაზეა საუბარი, ეს უპირობოდ სისხლის სამართლის წესით დასჯადი ქმედებაა. ასეთ დროს პირი შეიძლება ბრალდებული გახდეს და მტკიცებულებათა არსებობის შემთხვევაში - დაისაჯოს. ფსიქოლოგიურია ძალადობა, როცა მას ერთჯერადი სახე აქვს და არ არის სისტემატური. ასეთი დანაშაული ადმინისტრაციული წესით ისჯება. შემაკავებელი ორდენი გამოიწერება 1 თვით და ნებისმიერი სახის კომუნიკაცია იკრძალება. დამცავი ორდენს რაც შეეხება, მას სასამართლო გასცემს და 9 თვემდე ვადით კომუნიკაციის აღკვეთას ითვალისწინებს,“ განმარტავს ნათია ბარბაქაძე.

მისივე თქმით, ფიზიკური ძალადობა, რომელმაც გამოიწვია ტკივილი, ნაკლებად მძიმე დაზიანება, მძიმე დაზიანება, მკვლელობის მცდელობა და ოჯახის წევრის მკვლელობა დამამძიმებელი გარემოებით - უკვე სამართლებრივი წესით ისჯება.

„ისეთი მოცემულობა გვაქვს, რომ ოჯახური ძალადობის საქმეებში ბევრი მტკიცებულება არ არსებობს ხოლმე. როგორც არ უნდა ეცადოს გამოძიება მტკიცებულებების მოძიებას, ისინი ვერ იარსებებს. ამ შემთხვევაში ერთ-ერთი მთავარი პრობლემა - მოწმეთა ნაკლებობა.

ამას გარდა, ძალადობის მსხვერპლს ძალიან უჭირს მოძალადისგან წამოსვლა, რომ არაფერი ვთქვათ შესაბამის ორგანოებისთვის ფაქტის შეტყობინებაზე. ამის მრავალი მიზეზი არსებობს: ზოგჯერ მსხვერპლს მოძალადესთან სიყვარული აკავშირებს, ხშირად კი თავს შვილების გამო იკავებენ, ხან კი ქალს თმენას და მოძალადესთან ცხოვრებას ეკონომიკური დამოუკიდებლობის არქონა აიძულებს. ხელაღებით არ შეიძლება ქალი იმაში დაადანაშაულო, რატომ არ წამოვიდა მოძალადისგან, როცა მასზე პირველად იძალადეს. ზოგჯერ ენის ბარიერიც არსებობს. საქართველოს ყველა მოქალაქემ არ იცის ქართული, არ აქვთ ინფორმაცია, რომ თარჯიმნით მომსახურება არსებობს, არ იციან სად მივიდნენ, ვისთან და ა.შ. ქალებმა უნდა იცოდნენ, რომ სახელმწიფო მათ გვერდით დაუდგება. მთავარია გაბედონ, მიიღონ გადაწყვეტილება და ხმა ამოიღონ“, აღნიშნა ნათია ბარბაქაძემ.

გადაცემის სტუმარმა ძალადობის შემსწრე ბავშვის ფაქტორზეც ისაუბრა. მისი თქმით, მიუხედავად იმისა, რომ ოჯახში ძალადობა პირდაპირ ბავშვის მიმართ არ ხორციელდება ეს არ ნიშნავს, რომ ბავშვი ძალადობის მსხვერპლი არის. როცა საყვარელი ადამიანის მიმართ, მაგალითად დედის მიმართ განხორციელებულ ძალადობას ხედავს, ეს ბავშვზე ძლიერად ზემოქმედებს. კვლევებით დადგენილია, რომ 7-ჯერ უფრო მეტად იქცევიან მოძალადეებად ის ბავშვები, ვინც თვითონ იყვნენ ძალადობის მსხვერპლი. აქ არ აქვს მნიშვნელობა პირადად განიცდიდნენ ბავშვები ძალადობას, თუ ამის შემსწრეები იყვნენ. მშობლების ჭეშმარიტი ინტერესი არის ის, რომ ბავშვებმა მშვიდ გარემოში, ძალადობის გარეშე იცხოვრონ,“ განაცხადა ნათია ბარბაქაძემ.

მოამზადა მაკა ბიბილაშვილმა